Нацбанк спадзяецца на інфляцыю ў 20%

Улады Беларусі прагназуюць, што паводле вынікаў 2015 года інфляцыя ў Беларусі не перасягне 20%.

Пра гэта сказана ў паведамленні пра вынікі пашыранага пасяджэння праўлення Нацыянальнага банка. "Мэтавы арыентыр у інфляцыі ў 2015 годзе вызначаны на ўзроўні 18% з дапушчальным адхіленнем у памеры 2%", - сказана ў паведамленні.

Гэты ўзровень інфляцыі будзе дасягацца шляхам кантролю над грашовай прапановай з боку Нацбанка. Для гэтага будзе зроблены пераход да рэжыму манетарнага таргетавання. "Пры гэтым у якасці прамежкавага арыентыру грашова-крэдытнай палітыкі вызначаецца прырост сярэдняй шырокай грашовай сумы на ўзроўні не больш за 30% за 2015 год. У якасці аперацыйнага арыентыру грашова-крэдытнай палітыкі вызначаны прырост сярэдняй рублёвай грашовай базы", - сказана ў паведамленні рэгулятара.

Варта адзначыць, што паводле вынікаў 2014 года інфляцыя значна перасягла прагнозны параметр і склала 16,2%.

Нацыянальны банк таксама разгледзіць прапановы ў скарачэнні выкарыстання валюты пры разліках у Беларусі, піша "Інтерфакс".

"У рамках выканання стратэгічнай задачы дэдалярызацыі эканомікі і павышэння даверу да нацыянальнай валюты да канца лютага гэтага года праўленнем Нацыянальнага банка будуць разгледжаныя прапановы ў скарачэнні выпадкаў выкарыстання замежнай валюты, каштоўных папер і плацежных дакументаў у замежнай валюце пры разліках на тэрыторыі Беларусі", - адзначана ў паведамленні.

Адначасова, прадоўжылі ў НББ, плануецца прыняцце нарматыўнага прававога акта аб функцыянаванні лічбавага банкінгу ў Беларусі, накіраванага на стварэнне неабходных умоў для прапановы поўнага спектру банкаўскіх паслуг і прадуктаў праз дыстанцыйныя каналы абслугоўвання, спрашчэння ідэнтыфікацыі кліентаў - фізічных асоб і функцыянавання паўнавартаснага электроннага дакументазвароту без неабходнасці дадатковага патрабавання дакументаў на папяровым носьбіце.

Пра абмежаванні на крэдытаванне эканомікі

Нацыянальны банк Беларусі зніме ўсе простыя абмежаванні на крэдытаванне эканомікі з 1 лютага. "З 1 лютага 2015 года будуць скасаваныя ўсе простыя абмежаванні на крэдытаванне эканомікі, у тым ліку ў нулявым прыросце патрабаванняў банкаў да эканомікі ў беларускіх рублях", - адзначана ў паведамленні.

У Нацбанку адзначылі, што рэгуляванне крэдытнай актыўнасці будзе ісці на рынкавых прынцыпах на аснове агульнапрынятага рынкавага інструментара. "Пры вызначэнні сваіх планаў крэдытавання банкам варта кіравацца, перш за ўсё, неабходнасцю забеспячэння збалансаванасці актываў і пасіваў, складаючы з гэтай мэтай на рэгулярнай аснове прагнозы дынамікі актываў і пасіваў, распрацаваныя з улікам асноўных макраэканамічных паказчыкаў", - растлумачылі ў НББ.

Там таксама праінфармавалі, што ўрадам і Нацбанкам сумесна з банкамі вызначаныя параметры крэдытавання дзяржаўных праграм і мерапрыемстваў. "Банкі павінныя здзяйсняць крэдытаванне зыходзячы з наяўнасці рэальных крыніц фінансавання і адсутнасці рэсурснай падтрымкі з боку Нацыянальнага банка. Пры гэтым кіраўнікі банкаў будуць несці персанальную адказнасць за ўзгадненне праектаў аб крэдытаванні дзяржаўных праграм і мерапрыемстваў без наяўнасці адпаведных крыніц фінансавання", - прадоўжылі ў НББ.

"Працэнтная палітыка ў 2015 годзе будзе насіць антыінфляцыйную накіраванасць. Для гэтага працэнтныя стаўкі будуць падтрымлівацца станоўчымі ў рэальным выяўленні, а таксама будзе забяспечвацца перавышэнне даходнасці зберажэнняў у беларускіх рублях над валютнымі зберажэннямі", - дадалі ў Нацбанку.