Актывіста «Еўрапейскай Беларусі» выклікаюць на «гутарку» ў МУС
2- 12.10.2015, 18:56
- 10,398
Сёння актывісту «Еўрапейскай Беларусі» Леаніду Кулакову патэлефанавалі нібыта з МУС з прапановай сустрэцца для размовы.
Пра гэта Леанід Кулакоў паведаміў сайту charter97.org.
Cа слоў актывіста, невядомы мужчына патэлефанаваў яму сёння на мабільны тэлефон пад 17.30 і, назваўшыся «Сяргеем Сяргеевічам з МУС», прапанаваў сёння сустрэцца для размовы. Пры гэтым прычын і мэтаў такой «сустрэчы» невядомы не патлумачыў. Пасля адмовы Леаніда Кулакова мужчына прапанаваў яму ператэлефанаваць заўтра і дамовіцца аб сустрэчы на сераду.
Леанід Кулакоў вядомы сваёй актыўнай грамадскай дзейнасцю, за якую не раз падпадаў пад адміністрацыйныя арышты. На «выбарах» гэтага года ён быў незалежным назіральнікам на ўчастку №55 у Менску, а затым узяў удзел у акцыі супраць фальсіфікацыі выбараў.
Сам Леанід звязвае гэты званок з пададзенай ім скаргай на ўмовы ўтрымання ў ІЧУ Смалявіцкага раёна, дзе ён правёў 7 дзён адміністрацыйнага арышту паводле абвінавачвання ў правядзенні несанкцыянаванага пікету.