У Польшчы пачаліся вялікія вайсковыя вучэнні
- 13.10.2015, 19:39
- 12,046
13 кастрычніка на вайсковым палігоне ў польскім горадзе Ожышы пачаліся вялікія вайсковыя вучэнні на тэрыторыі Польшчы Dragon 15.
У вучэннях, якія будуць доўжыцца да 23 кастрычніка, бяруць удзел 7000 жаўнераў, у тым ліку з ЗША, Канады, Вялікабрытаніі і Нямеччыны. У вучэннях задзейнічаныя 700 танкаў, паведамляе «Радио Польша».
У рамках вучэнняў жаўнеры будуць праводзіць як наземныя, так і паветраныя аперацыі. Паводле сцэнару, на фоне барацьбы за карысныя выкапні адбываецца сур'ёзны міжнародны канфлікт, дыпламатычныя перамовы не прыносяць вынікаў і пачынаюцца вайсковыя дзеянні. Жаўнеры мусяць адбіць напад супраціўніка і правесці контратаку.
У вучэннях возьмуць удзел не толькі жаўнеры, але і службоўцы рэзэрву, а таксама добраахвотнікі з Нацыянальных рэзэрвовых сіл Польшчы. Яны будуць выконваць тыя ж заданні, што і прафесійныя вайскоўцы.
У вучэннях будуць выкарыстаны танкі Leopard, бронетранспарцёры Rosomak, ракетныя ўстаноўкі Langusta, супрацьпаветраныя ўстаноўкі, артылерыя, а таксама вайсковыя самалёты і гелікаптэры.