Незалежныя прафзвязы ўпершыню за шэсць гадоў атрымалі дазвол на акцыю

БКДП атрымаў дазвол Менгарвыканкама на правядзенне мітынгу 7 кастрычніка 2015 года з нагоды Сусветнага дня барацьбы за годную працу.

Пра гэта charter97.org паведамілі ў прэс-службе Беларускага кангрэсу дэмакратычных прафзвязаў.

Акцыя адбудзецца на Цэнтральнай сцэнічнай пляцоўцы сталічнага парку Дружбы народаў на плошчы Бангалор з 17.00 да 18.00. Мяркуецца, што ў мітынгу возьмуць удзел блізу 200 актывістаў, якія знаходзяцца ў чатырох арганізацыях БКДП: БНП, СПБ, СПМ і прафзвязе РЭП.

Нагадаем, пачынаючы з 2008 года, Міжнародная канфедэрацыя прафзвязаў (МКП) праводзіць 7 кастрычніка дзень сусветнай мабілізацыі - дзень, калі прафзвязы ўсяго свету патрабуюць годнай працы. У гэтым годзе акцыя будзе праходзіць пад усеагульным дэвізам: «Скончым з хцівай карпарацый!».