Жыхары Баранавічаў дамагліся стварэння беларускамоўнага класа
5- 7.10.2015, 18:37
- 14,151
Бацькі дзвюх дзяўчатак паўтара года беспаспяхова звярталіся ў розныя інстанцыі, каб іх дзеці вучыліся на роднай мове.
Старшыня Баранавіцкага гарвыканкама асабіста разгледзеў гэтую праблему і знайшоў сродкі для фінансавання класа на роднай мове, піша intex-press.by.
Клас пачне сваю працу ў Баранавіцкай гімназіі №4 з другой чвэрці, паведаміў Вадзім Шчарбакоў, дырэктар гэтай навучальнай установы.
- Вучні іншых гімназій горада, якія хочуць вучыцца па-беларуску ў 6-м класе, могуць ужо цяпер звяртацца да нас, - растлумачыў Вадзім Шчарбакоў. - Дзецям са школ давядзецца пачакаць да наступнага года і здаць іспыты ў расейскай, беларускай мовах і матэматыцы. Як, зрэшты, і кожнаму, хто хоча вучыцца ў гімназіі.
Са слоў кіраўніка гімназіі №4, пастанова аб заснаванні беларускамоўнага класа была прынята дзякуючы старшыні Баранавіцкага гарвыканкама Юрыю Грамакоўскаму. Ён асабіста разгледзеў гэтую праблему і знайшоў сродкі для фінансавання класа на роднай мове.
Нагадаем, што ў 2010 годзе ў Баранавічах у СШ №14 быў створаны беларускамоўны клас, дзе вучыліся тры дзяўчынкі. Праз чатыры гады дзве з іх - Яся Малашчанка і Аліса Філіпчык - паступілі ў гімназію №4. Аднак у стварэнні асобнага класа для прадаўжэння навучання на беларускай мове ім адмовілі, спаслаўшыся, што ў бюджэце горада няма дадатковых фінансавых сродкаў на беларускі клас. У Баранавіцкім гарвыканкаме тады патлумачылі, што клас будзе створаны толькі калі бацькі 24 вучняў захочуць, каб іх дзеці вучыліся па-беларуску.
- Я вельмі рады, што мая дачка будзе вучыцца на беларускай мове ў найлепшай гімназіі горада, - прызнаўся Васіль Філіпчык, бацька адной з дзяўчынак. - Але хацелася б, каб у будучыні была спрошчаная сістэма адкрыцця такіх класаў.
Са словах бацькі, за паўтары гады, каб дамагчыся навучання на роднай мове, ім давялося звяртацца ў мноства інстанцый: гарвыканкам, аблвыканкам, Міністэрства адукацыі, суд, пракуратуру. Нават сустрэцца з намеснікам міністра адукацыі.
- Іншы чалавек ужо калі б і хацеў, каб ягонае дзіця вучылася па-беларуску, атрымаў бы некалькі адпісак і махнуў бы рукой, - кажа Васіль. - Не ўсе такія зацятыя, як мы.