Прадпрымальнік з Ваўкавыску «разбагацеў» на алеі ды кансервах
5- 25.11.2015, 9:20
- 18,265
Дырэктар ваўкавыскай фірмы купіў прадукты на паўмільярда рублёў, а пастаўшчыкам не заплаціў. Цяпер яму пагражае да дзесяці гадоў пазбаўлення волі.
Як высветлілі спецыялісты УДФР Камітэта дзяржкантролю, 44-гадовы дырэктар аптовай фірмы купляў кансервы і алей у беларускіх вытворцаў. Гэтыя прадукты прадаваў за гатоўку, а грошы забіраў сабе. Пакуль даўнія партнёры судзіліся з камерсантам за запазычанасці, ён выкарыстаў тую ж нелегальную схему з іншымі прадпрыемствамі, піша «Вячэрні Гродна».
Вядома, што так ён падмануў пяць пастаўшчыкоў на суму больш за 554 млн рублёў. Мужчына змешчаны пад варту. У дачыненні да яго распачатая крымінальная справа за ўхіленне ад выплаты крэдыторскай запазычанасці, махлярства. Пагражае пазбаўленне волі. На маёмасць дырэктара, у тым ліку зямельны пляц і аўтамабіль, накладзены арышт.