Расейскага дыпламата абакралі ў менскай цырульні
6- 27.11.2015, 16:11
- 11,648
Паход у адну са сталічных цырульняў скончыўся для супрацоўніка расейскай амбасады ў Беларусі стратай 250 даляраў і 1,5 мільёнаў рублёў.
Міліцыя просіць дапамогі ў вышуку злодзея. Пра гэта паведамляе прэс-служба ГУУС Менгарвыканкама.
Крадзеж адбыўся 25 лістапада ўдзень блізу 13.00.
«З заявай аб крадзяжы партманэта ў міліцыю звярнуўся работнік пасольства Расейскай Федэрацыі ў Рэспубліцы Беларусь. У партманэце знаходзіліся 250 даляраў ЗША, 1 500 000 беларускіх рублёў, дыпламатычная карта і пасведчанне кіроўцы», - распавялі ў міліцыі.
Камеры відэаназірання, усталяваныя ў цырульні, змаглі захаваць падазраванага.
«Калі вы ведаеце грамадзяніна на відэа, альбо маеце інфармацыю пра ягонае месцазнаходжанне, просім звяртацца ў Ленінскае РУУС г. Менска альбо па тэлефонах: (017) 367-62-02; (017) 368-63-49, 8029 169 46 19, альбо па тэлефоне міліцыі 102», - звярнуліся з просьбай аб дапамозе ў вышуку злодзея праваахоўныя органы.
Канфідэнцыяльнасць і ўзнагароджанне гарантуецца.