Каб трапіць ва Украіну, расейскія самалёты на паўгадзіны прызямляюцца ў Гомелі

Гомель стаў транзітным пунктам паміж Масквой і Кіевам і збіраецца прымаць рэгулярныя рэйсы.

Не толькі палітычным, але і транспартным пасярэднікам у канфлікце Расеі ды Украіны становіцца Беларусь. І пры гэтым атрымлівае адчувальную эканамічную выгаду. Пасля ўзаемнай забароны авіязлучэнняў паміж Расеяй і Украінай самалётам даводзіцца рабіць вялікае кола: да прыкладу, з Масквы ў Кіеў пасажыры цяпер лётаюць праз Малдову. Але многія авіякампаніі знайшлі выхад і наладзілі авіязлучэнні праз беларускі Гомель. Самалёт з Масквы робіць пасадку ў Гомелі, а потым далей ляціць ва Украіну, і фармальна прыбывае ўжо не з Расеі, а з Беларусі. Пакуль Гомель прымае толькі чартарныя рэйсы, але ёсць планы і для адкрыцця рэгулярных авіязлучэнняў, піша «Комсомольская правда в Беларуси».

- Замежныя авіякампаніі таксама не могуць ляцець наўпрост з Масквы ў Кіеў. Але сур'ёзныя сувязі паміж Расеяй і Украінай не перапыніліся раптоўна. Самалёты бізнэс-класа лётаюць адзін да аднаго рэгулярна. З Гомеля да сталіцы Украіны - менш за 300 кіламетраў, да Масквы - 650 кіламетраў. Лётаць да нас сталі з канца кастрычніка. Спачатку было трохі рэйсаў, але неўзабаве авіякампаніі зразумелі, што ў нас надзейны аэрапорт, хуткае абслугоўванне - і заяўкі пачалі паступаць стала. Садзяцца да нас транзітам, праходзяць усе памежныя і мытныя працэдуры і ляцяць далей, - тлумачыць намеснік начальніка гомельскага філіяла «Белаэранавігацыя» Анатоль Кірсанаў.

Мы чакалі сустрэць ажыўленне ў аэрапорце, але ўнутры было пуста. Табло прылётаў і вылетаў выключанае. Рэч у тым, што гаворка пакуль ідзе не пра турыстычныя чартары, а пра пералёты буйных бізнэсоўцаў і палітыкаў. Як правіла, на борце транзітных самалётаў праз Гомель, - усяго ад 3 да 10 пасажыраў. Бо замовіць чартарны рэйс - нятаннае задавальненне. Лётаюць праз Гомель не толькі з Кіева, але і з Адэсы, Днепрапятроўска, Харкава і не толькі ў Маскву, але і ў Піцер, Екацярынбург. Дарэчы, надоечы так ляцеў былы прэзідэнт Украіны Леанід Кучма.

У пятніцу, да прыкладу, Гомель прымаў рэйсы сербскай авіякампаніі з Кіева ў Маскву і з Масквы ў Адэсу, аўстрыйскай, мальтыйскай і сан-марынскай авіякампаній - з Масквы ў Кіеў.

- Заяўкі паступаюць аператыўна і часта дадаюцца цягам дня. Абслугоўваць самалёты нам эканамічна выгадна, расце экспарт паслуг. Напрыклад, кожны ўзлёт-пасадка прыносіць амаль 600 даляраў, а некаторыя і запраўляюцца, аддаючы за тону газы амаль тысячу даляраў. Пасажыры чартараў губляюць у Гомелі зусім няшмат часу на памежныя і мытныя працэдуры, нават не затрымліваючыся ў аэрапорце больш за 30 хвілін. Хутка праходзяць кантроль і ляцяць далей, бо пасажыраў у салоне мала. Пры гэтым выходзіць з самалёта не абавязкова, толькі на жаданне. Часцей памежнікі і мытнікі самі заходзяць у салон.

«Дамы з сабачкамі» такімі чартарамі не лятаюць, а толькі дзелавыя людзі з партфелямі. Паколькі багажу практычна няма, мытня таксама праходзіць хутка. Нярэдка цягам дня самалёт ляціць праз Гомель і ў зваротным кірунку. Пры гэтым нумар рэйса пасля пасадкі і ўзлёту ў Гомелі не мяняецца.

Цяпер ідуць перамовы, і расейская авіякампанія «Перамога» рыхтуецца выконваць рэгулярныя штодзённыя рэйсы з Масквы ў Гомель на «Боінгах 737-800» умяшчальнасцю 189 крэслаў. Калі лоўкостэр вызначыцца з тарыфамі і раскладам, гомельскі аэрапорт будзе гатовы прапанаваць свае паслугі ўкраінскім авіякампаніям, каб стыкаваць рэйсы.

Кіраўніцтва гомельскага філіяла «Белаэранавігацыя» мяркуе, што аэрапорт зможа прымаць пасажыраплыні міжнародных рэйсаў:

- Калі аэрапорт «Гомель» перадалі «Белаэранавігацыя», яго стан быў вельмі гнятлівы. Але кожны год мы вялі работы для рэканструкцыі і мадэрнізацыі. Хутка зменіцца пасажырскі павільён часоў СССР, міжнародныя палёты тут не выконваліся. Мы пакуль прыстасавалі павільён, але ўсё адно ён не вельмі адпавядае сучасным стандартам. Да прыкладу, пасажыры не аддаюць свае валізкі пры рэгістрацыі, а коцяць далей да лініі надгляду. А гатэль, перададзены ў камунальную ўласнасць, прадалі інвестару, які, спадзяемся, пры больш інтэнсіўных палётах зоймецца будынкам.

Дарэчы, можа быць карысным гомельскаму аэрапорту і канфлікт Расеі з Турцыяй. Калі да пачатку турыстычнага сезону Расея не адновіць авіязлучэнні ў папулярную для адпачынку краіну, свае паслугу зможа прапанаваць Гомель. Але праграмы рэйсаў на 2016 год пакуль няма.

Ці зможа гомельскі аэрапорт гарантаваць бяспеку пасажырам міжнародных рэйсаў, асабліва ўлічваючы апошнія тэракты?

- Мы маем сучаснае абсталяваннем для надгляду, прыцягваем пры неабходнасці кінолагаў. Людзі ў нас навучаныя, ва ўсіх ёсць сертыфікаты. Так што за бяспеку пасажырам не трэба перажываць. Інцыдэнтаў ніколі не было. Пасажыры разумеюць, што такое бяспека, таму здымаюць абутак на нашае патрабаванне, уключаюць ноўтбукі. Словам, ставяцца з разуменнем, - адказаў начальнік падраздзялення авіяцыйнай бяспецы Уладзімір Мукасей.