Вітольд Вашчыкоўскі здзейсніў свой першы афіцыйны візіт у Нямеччыну
- 27.11.2015, 20:51
- 10,477
26 лістапад кіраўнік МЗС Польшчы Вітольд Вашчыкоўскі сустрэўся ў Бэрліне са сваім нямецкім калегам Франкам-Вальтэрам Штайнмаерам.
Падчас прэс-канферэнцыі кіраўнік польскай дыпламатыі адзначыў, што гэта «сентыментальная паездка да старых добрых сяброў і суседзяў» і падкрэсліў, што мае намер падтрымліваць польска-нямецкае сяброўства і супрацоўніцтва, паведамляе «Радыё Польшча».
У сваім выступе Вітольд Вашчыкоўскі заявіў, што на гэты момант Польшча з'яўляецца «флангавай краінай Еўразвязу і NATO».
«Каля нашых межаў адбываюцца вельмі дрэнныя рэчы. Я маю на ўвазе сітуацыю ва Украіне. Мы павінны гаварыць з суседзямі пра тое, як гэта выправіць», - казаў Вашчыкоўскі.
Ён таксама падкрэсліў, што Нямеччына адыгрывае важную ролю ў развязанні канфлікту ва Украіне.
«Я хачу вызначыць - што чакае нас праз месяц, калі скончыцца тэрмін Менскіх пагадненняў», - падкрэсліў ён.
Адзначым, што кіраўнік польскай дыпламатыі толькі мімаходзь закрануў тэму ўцекачоў. «Пра гэта яшчэ будзе час пагаварыць», - сказаў ён.
У сваю чаргу, кіраўнік МЗС Нямеччыны Франк-Вальтэр Штайнмаер заявіў, што цалкам давярае новаму польскаму ўраду, узначаленаму прэм'ер-міністрам Беатай Шыдла, і гатовы з ім супрацоўнічаць.