«Ашчадбанк» Расеі: Беларусь у 2016 годзе чакае рэцэсія ва ўсіх галінах
5- 30.11.2015, 12:34
- 7,938
Рэцэсія эканомікі будзе суправаджацца зніжэннем рэальных заробкаў у насельніцтва.
Вынікі працы беларускай эканомікі за студзень-кастрычнік, на думку расейскіх экспэртаў, паказвае на зніжэнне эканамічнай актыўнасці ў Беларусі «ва ўсіх галінах без выключэння». Нагадаем, УБП Беларусі ў студзені-кастрычніку знізіўся на 3,9%.
«Мы звязваем такое значнае скарачэнне эканомікі з выкарыстаннем кампрэсіі як унутранага, так і замежнага попыту. Эканамічныя праблемы Расеі, асноўнага гандлёвага партнёра Беларусі, адбіліся на аб'ёмах тавараў і паслуг, што пастаўляюцца. Экспарт у Расею паводле вынікаў студзеня-верасня скараціўся на 33,6%», - гаворыцца ў эканамічным аглядзе Цэнтра макраэканамічных даследаванняў расейскага «Ашчадбанка».
Аналітыкі «Ашчадбанка» канстатуюць, што зніжэнне ў Беларусі рэальных заробкаў «праз багацці эканамічных шокаў працягваюцца цягам ужо 16 месяцаў», і гэта ўжо адбілася на выдатках насельніцтва. «Рост рознічнага тавараабароту вагаецца блізу нулявой адзнакі цягам ўсяго 2015 года», - адзначаюць аналітыкі «Ашчадбанка».
Расейскія экспэрты чакаюць, што налета беларуская эканоміка ўслед за расейскай будзе паступова аднаўляцца, аднак дынаміка УБП будзе заставацца ў адмоўнай зоне.
«Налета мы чакаем запаволення скарачэння эканомікі да мінус 1,1%», - тлумачаць свой прагноз аналітыкі «Ашчадбанка».
У сярэднетэрміновай перспектыве расейскія экспэрты чакаюць працягу рэцэсіі ў Беларусі.
«Драйвераў, здольных вывесці беларускую эканоміку на траекторыю ўстойлівага эканамічнага росту, мы цяпер не бачым», - прагназуюць аналітыкі расейскага «Ашчадбанка».