Рассельгаснагляд забараніў увоз 20 тон турэцкіх агуркоў з Беларусі

Агуркі прызначаліся для адной з арганізацый Санкт-Пецярбурга.

Рассельгаснагляд забараніў увоз з Беларусі 20 тон свежых агуркоў, вырашчаных у Турцыі. Пра гэта паведамляе прэс-служба ўстановы, піша ТАСС.

"Спецыялістамі аддзела каранціннага фітасанітарнага кантролю на Дзяржаўнай мяжы Расейскай Федэрацыі Управы Рассельгаснагляду Цвярской і Пскоўскай абласцей вёскі Далосцы (Пскоўская вобласць) забаронены ўвоз з Рэспублікі Беларусь партыі свежых агуркоў, вырашчаных у Турцыі, вагой 20 тон", - гаворыцца ў паведамленні.

Адзначаецца, што прычынай забароны паслужыла неадпаведнасць інфармацыі аб колькасці ўпаковачных месцаў у рээкспартным фітасанітарным сертыфікаце Беларусі і фітасанітарных сертыфікатах краіны паходжання (Турэцкая Рэспубліка).

Пладова-агароднінная прадукцыя прызначалася для адной з арганізацый Санкт-Пецярбурга. Груз вернуты на сумежную тэрыторыю.