Экс-міністр сацыяльнай абароны: Чаму вы ўзяліся за мяне? Што, больш няма пра што пісаць, ці што?

Антаніна Морава сцвярджае, што яе заявы аб дэкрэтным адпачынку «сказілі».

У апошнія дні беларускія СМІ растыражавалі выказванні сустаршыні Беларускага саюза жанчын, былога міністра працы і сацыяльнай абароны. Паведамлялася, што на канферэнцыі, прысвечанай сацыяльнай абароне, Антаніна Морава заявіла, што трохгадовы дэкрэтны адпачынак для жанчын - гэта марнатраўства. Аднак сама чыноўніца сцвярджае, што такога не гаварыла і яе словы сказілі, піша «Наша нiва».

- Вы казалі, што жанчынам трэба выходзіць з дэкрэта раней?

- Я так не казала, вось у чым справа! Мае словы сказілі і так далі. Сяджу сёння цэлы дзень і тлумачу, што гэта не мае словы. Я не ведаю, хто гэта сказаў. Я нікому не давала ніякага інтэрв'ю і не разумею, што гэта за выпады ў мой бок. Я не ведаю, што там за дзяўчына была, якая задала мне правакацыйнае пытанне. Я пачала адказваць, але дэкрэт і выплаты - гэта сацыяльная гарантыя, якая вызначана дзяржавай. А я казала, што трэба ісці далей, трэба развіваць сямейную інфраструктуру: сады, яслі. Вось мая думка, мае словы, за гэта я адказваю.

- Гэта значыць, вы мяркуеце, што не трэба памяншаць гэты трохгадовы тэрмін?

- Чаму вы ўзяліся за мяне? Што, больш няма пра што пісаць, ці што? Пяты званок за сёння!

Я ў прынцыпе не магла гэтага сказаць! Я сказала, што перыяд дэкрэта ў нас вялікі - тры гады. Такое толькі ў нас і ў Расеі. Прычым там аплачваюць 1,5 гады, а ў нас усе 3. Да таго ж, мы нядаўна павялічылі суму дапамогі і гэта добра, таму што за кошт гэтага павялічылі нараджальнасць, плюс ільготы на жыллё паўплывалі... Гэта я адзначала. А аб скасаванні або скарачэнні тэрміну я не казала.

Так, я ўспамінала, што жанчыны нярэдка выходзяць з дэкрэта раней праз розныя прычыны. Хтосьці заклапочаны кар'ерай, не стае грошай сям'і - ёсць і такая нагода.

- Дык можа трэба неяк павялічыць гэтыя выплаты? Вы ж самі прызнаеце, што не стае грошай. Што такое сёння тры мільёны? Менш за 200 даляраў.

- Для гэтага павінны быць сродкі ў дзяржавы. А тры мільёны - так за тры мільёны сёння і на працу не так проста ўладкавацца, калі вы ведаеце! Сёння рынак працы дастаткова напружаны.

- Вы мяркуеце, што гэта дастатковая сума?

- Я кажу, што ёсць такія сем'і, якія наважваюць, што жанчына павінна пайсці на працу, каб кар'ера яе не спынялася. І каб больш грошай было ў сям'і, таму што і кватэру хочацца, і хочацца мець і іншыя даброты, тут нічога дрэннага няма. А вось каб далей дапамагчы гэтым людзям, калі жанчына раней хоча выйсці на працу, трэба развіваць сямейную інфраструктуру.

- Дык ці можа дзяржава павысіць гэтыя выплаты?

- Гэта вы не ў мяне пытайцеся. Можа і можна, але яны павінны быць адраснымі. Можна зрабіць кампенсацыі, калі набылі нешта для дзіцяці, прынеслі чэк, і людзям вяртаюць грошы. Гэта складаны механізм, але яго можна стварыць.

- Вы казалі, што крызісу сям'і сёння няма... Але ў нядаўнім інтэрв'ю газеце «Звязда» ўспаміналі, што 40% шлюбаў заканчваюцца разводам, а 40% сем'яў - няпоўныя. Ці гэта не крызіс?

- Трэба глядзець, што разумець як крызіс. У нас крызісу няма ў тым плане, што нараджальнасць павысілася. А няпоўныя сем'і - гэта дрэнна, вядома.