У Баранавічах праз нічыйны пакет эвакуявалі вакзал
4- 1.12.2015, 17:19
- 12,861
Пасажыры чыгуначнага вакзалу ў Баранавічах былі эвакуяваныя днём 1 снежня праз падазроны пакет.
Патруль міліцыі звярнуў увагу на пакет, які ляжыць на падваконні ў касавай зале чыгуначнага вакзала «Баранавічы-Палескія».
«Гаспадара пакета сярод пасажыраў, што сядзелі ля акна, не было. Металашукальнік на знаходку зрэагаваў, таму выклікалі сапёрна-піратэхнічную групу», - паведаміў Intex-press начальнік Баранавіцкага АУС на транспарце Сяргей Фясюн.
Пасажыраў эвакуявалі, будынак ачапілі. Сапёры, якія прыбылі на месца здарэння, устанавілі, што ў пакеце знаходзяцца прадукты харчавання, частка была загорнутая ў фальгу. На яе і зрэагаваў металашукальнік.
«Спрацавалі аператыўна. На ўсе спатрэбілася літаральна паўгадзіны. Затрымкі цягнікоў не было», - адзначыў Сяргей Фясюн.
З камер відэаназірання выявілі, што ўладальнік пакета купіў квіток на прыгарадны цягнік. Але хто ён - жыхар Баранавічаў або прыехаўшы - пакуль не вядома.
Нагадаем, што 20 лістапада ў Менску станцыю метро «Партызанская» эвакуявалі праз нічыйную скрынку.