Максім Вінярскі: Студэнтам трэба вылучаць палітычныя патрабаванні
2- 1.12.2015, 17:38
- 25,987
У праблемах студэнтаў БДУ вінаваты не пэўны дэкан, рэктар ці міністр адукацыі, а ўся сістэма кіравання ў Беларусі.
Пра гэта charter97.org заявіў каардынатар грамадзянскай кампаніі «Еўрапейская Беларусь» Максім Вінярскі, каментуючы падрыхтоўку да «Маршу студэнтаў». Актывіст заявіў, што рана ці позна ім давядзецца вылучаць палітычныя патрабаванні.
«Я цалкам згодны з патрабаваннямі студэнтаў БДУ і цалкам падтрымліваю акцыю пратэсту, якая пройдзе заўтра, - заявіў Максім Вінярскі. Пераздачы ў іншых ВНУ краіны, у тым ліку і ў Беларускім дзяржаўным тэхналагічным універсітэце, дзе я вучуся ўжо даўно, зрабілі платнымі. Рады, што ў БДУ адкрыта выступілі супраць гэтага і пачалі змагацца за свае правы. Спадзяюся, што іх прыкладу рушаць услед і студэнты іншых ВНУ.
Важна, каб студэнты разумелі, што ў іх праблемах вінаваты не пэўны дэкан, рэктар ці міністр адукацыі, а ўся сістэма кіравання ў Беларусі, якая заганная па сваёй сутнасці. Трэба вылучаць палітычныя патрабаванні. Студэнты заўсёды былі найбольш дынамічнай, смелай і часткай грамадства і станавіліся рухаючай сілай пратэсту. Сорамна баяцца, калі табе 18-20 гадоў. Студэнты ўзначальвалі пратэсты ў Францыі ў 1968 годзе, у Сербіі, калі скінулі Мілошавіча, ва Украіне падчас Еўрамайдану. Такое было і ў Беларусі падчас «Менскай вясны» 1996 года. Упэўнены, што калі беларускія студэнты змогуць самаарганізавацца, пераадолець страх і будуць паслядоўныя ў сваіх патрабаваннях, яны змогуць не толькі дамагчыся сваіх мэтаў, але і стануць рухаючай сілай пераменаў у краіне».
Нагадаем, рознагалоссі паміж студэнтамі і адміністрацыяй БДУ пачаліся пасля таго, як у ВНУ агучылі планы ўвесці аплату за пераздачу залікаў і экзаменаў. Універсітэцкую моладзь абурыла такая перспектыва. Студэнты сабралі супраць новаўвядзення больш за 2500 подпісаў, а ў сацыяльных сетках паўсталі пратэстныя групы. Іх ўдзельнікі паведамілі пра намер заявіць на ВНУ ў пракуратуру, калі аплата за пераздачы будзе ўведзеная.
Нягледзячы на пратэсты, 12 лістапада рэктар БДУ падпісаў палажэнне аб платных пераздачах.
У адказ актывісты запланавалі 2 снежня правесці ў Менску марш студэнтаў. Чакаецца, што да яго далучацца ад 300 да 500 чалавек. 26 лістапада на старонцы мерапрыемства з'явілася завочнае запрашэнне на акцыю рэктара ВНУ.