Марцін Шульц: Еўразвяз скептычна назірае за падзеямі ў Афінах
12- 1.02.2015, 14:46
- 15,318
Старшыня Еўрапарламента параіў зноў прызначанаму прэм'ер-міністру Грэцыі Алексісу Цыпрасу спыніць нападкі на Ангелу Мэркель.
Пра гэта Марцін Шульц распавёў у інтэрв'ю нямецкаму выданню Welt am Sonntag, піша gordonua.com.
"Урад у Афінах не мае вялікага досведу, Алексісу Цыпрасу варта засяродзіцца", - адзначыў ён.
На думку Шульца, нападаць на немцаў - гэта "акрамя ўсяго іншага, блізарука: бо калі каму і давядзецца дапамагаць Грэцыі, дык гэта не ў апошнюю чаргу Нямеччыне".
У сувязі з гэтым кіраўнік Еўрапарламента параіў грэкам не рабіць з Нямеччыны казла адпушчэння. "Увесь Еўразвяз скептычна назірае за падзеямі ў Афінах. Калі Цыпрас аднабакова скасоўвае правілы, то гэта вельмі шмат каму не падабаецца", - дадаў ён.
У Грэцыі кіруючую кааліцыю сфармавалі левыя радыкалы з партыі "СІРЫЗА", якія перамаглі ў парламенцкіх выбарах, і правая нацыяналістычная партыя "Незалежныя грэкі".
Кааліцыя мае намер весці жорсткую палітыку супраць "плану выратавання", які цяпер дзейнічае ў Грэцыі і які прывёў да пяці гадоў жорсткіх эканамічных мер. Партыя "СІРЫЗА" выступае супраць рэжыму эканоміі, хоча вывесці Грэцыю з еўразоны і настроена супраць санкцый у дачыненні да Расеі.
У аўторак, 27 студзеня, у Прэзідэнцкім палацы ў Афінах адбылася цырымонія ўступлення ў пасаду новага Кабінета міністраў, які ўзначаліў лідар партыі "СІРЫЗА" Алексіс Цыпрас пасля перамогі на парламенцкіх выбарах у мінулую нядзелю.