Зваршчык з Гродна стаў уладальнікам трох рэкордаў Гінеса

Яўгену Назарэвічу, вядомаму гродзенскаму гіравіку, уладальніку трох рэкордаў Гінеса, у знак прызнання заслуг уручылі залатую гіру.

Падобным «знакам якасці» адзначаны ўсяго дванаццаць спартсменаў на ўсім зямным шары.

Гэтую ўзнагароду ўручыў Яўгену на чэмпіянаце свету ў Архангельску Анатолій Яжоў, кіраўнік міжнароднай федэрацыі трыятлоне. З Лондана прыляцеў і камісар штаб-кватэры Кнігі рэкордаў Гінеса: ён прывёз сертыфікат, які пацвярджае, што трэці рэкорд Яўгена Назарэвіча, усталяваны ў снежні мінулага года, прызнаны афіцыйна.

На гэтым узнагароды не скончыліся. Яўген падчас чэмпіянату свету здабыў залаты медаль у дваябор'і з 32-кілаграмовай гірай. За дзесяць хвілін атлет падняў больш за 5 тон!

- Здорава выступіў і ў складзе зборнай краіны ў гіравой эстафеце. На рахунку беларускай дружыны залаты медаль, - распавёў карэспандэнту «Гродзенскай праўды» Яўген Назарэвіч. - У планах замахнуцца на яшчэ адзін рэкорд, праўда, залежыць гэта будзе ад ступені гатоўнасці. Добра цяпер ад трэніровак нічога не адцягвае: кіраўніцтва прадпрыемства падтрымлівае мяне ва ўсіх пачынаннях.

Яўген працуе электрагазазваршчыкам на заводзе ЖБК ААТ «Гроднапрамбуд». Працаўнік, як адзначаюць на прадпрыемстве, прыкладны. Нягледзячы на пропускі, звязаныя з выездам на спаборніцтвы, адпрацоўвае іх максімальна.

- Такія людзі - гонар не толькі нашай арганізацыі, але і ўсяго горада. Яўген для многіх - прыклад таго, што дае здаровы лад жыцця. А гэта падвышае прадукцыйнасць працы, умацоўвае дысцыпліну, паляпшае маральны клімат у калектыве, - адзначыў генеральны дырэктар ААТ «Гроднапрамбуд» Абдулвагаб Вагабаў.

Спорт у любых яго праявах актыўна падтрымліваецца кіраўніцтвам акцыянернага таварыства. Дарэчы, у калектыўны кантракт тут нядаўна ўнеслі дадатак, згодна з якім пераможцам чэмпіянатаў свету, краіны, вобласці, рэкардсменам Кнігі рэкордаў Гінеса гарантаваная вялікая прэмія.

У кастрычніку Гродна прыме чэмпіянат свету у гіравым спорце.

Фота: «Гродзенская праўда»