Намеснік Макея: У Беларусі ды ісламскіх краін супадаюць падыходы да сямейных вартасцяў

Намеснік міністра замежных спраў Беларусі Валянцін Рыбакоў правёў у штаб-кватэры ААН у Нью Ёрку прэзентацыю кнігі «Беларусь і мусульманскі свет».

Яе аўтарам стаў беларускі гісторык Уладзімір Ліхадзедаў, паведамілі ў прэс-службе МЗС.

«Валянцін Рыбакоў адзначыў супадзенне і сугучнасць падыходаў і прыярытэтаў Беларусі і краін - чальцоў Арганізацыі ісламскага супрацоўніцтва (АІС) на міжнароднай арэне, найперш у такіх галінах, як сямейныя вартасці, рэлігійная памяркоўнасць, устойлівае развіццё. Намеснік міністра выказаў спадзяванне, што кніга «Беларусь і мусульманскі свет» дапаможа дзяржавам - чальцам АІС больш даведацца пра Беларусь, пра яе паважлівае стаўленне да мусульман і ісламу, пра намеры мацаваць шматпланавае узаемавыгаднае супрацоўніцтва на міждзяржаўным узроўні», - паведамілі ў МЗС.

«Прэзентацыя адбылася на спецыяльна скліканай сустрэчы кіраўнікоў дыпламатычных місій краін - чальцоў АІС пры ААН», - растлумачылі ў міністэрстве. Звяртаючыся да ўдзельнікаў сустрэчы, Валянцін Рыбакоў звярнуў увагу, што ў Беларусі ўжо досыць даўно жывуць мусульмане, у краіне склаліся трывалыя традыцыі талерантнага і паважлівага стаўлення беларусаў да ісламу і людзей, якія вызнаюць гэтую рэлігію.

«Падчас абмену думкамі замежныя дыпламаты выказалі падтрымку ініцыятывам і лідэрскай ролі Беларусі ў ААН у пытаннях барацьбы з гандлем людзьмі і абароны традыцыйных сямейных вартасцяў», - адзначылі ў МЗС Беларусі.