Аўстралія ўвяла санкцыі ў дачыненні да Расеі
4- 31.03.2015, 7:40
- 15,957
Канбэра ўвяла санкцыі супраць Масквы, аб прыняцці якіх было абвешчана яшчэ летась ў верасні.
Як заявіла міністарка замежных спраў Аўстраліі Джулія Бішоп, санкцыі, што ўводзяцца, аналагічныя тым, што ўжо прынятыя краінамі Еўразвязу, а таксама ЗША і Канадай. Яны закрануць гандаль зброяй, фінансавую і нафтагазавую сферы, паведамляе BBC.
Раней краіны ЕЗ адклалі пастанову пытання аб санкцыях, накладзеных на Расею ў сувязі з украінскімі падзеямі, да чэрвеня 2015 г. - тэрміну, на які яны першапачаткова і ўводзіліся.
Кіраўнік Еўрарады Дональд Туск заявіў, што санкцыі будуць дзейнічаць, пакуль не будуць выкананыя ўсе ўмовы Менскіх пагадненняў аб спыненні агню ва Украіне.