Запіс рэгістратара аўто праз тры хвіліны пасля забойства Нямцова (Відэа)
38- 4.03.2015, 15:28
- 91,384
Відэазапіс, зроблены рэгістратарам аўтамабіля праз тры хвіліны пасля забойства Барыса Нямцова, выкладзены ў інтэрнэце.
Яго апублікавала журналістка Тоня Самсонава ў блогу на сайце радыёстанцыі «Эхо Москвы».
«Мне перадалі запіс відэарэгістратара аўтамабіля, які праехаў па Васільеўскім спуску і Маскварэцкім мосце праз 3 хвіліны пасля забойства Барыса Нямцова. Запіс вядзецца з 23 гадзін 34 хвілін», - піша яна.
На 49 секундзе відэа прыкметна, што снегаўборачная машына і аўтамабіль белага колеру, якія фігуруюць у справе аб забойстве, знаходзяцца вельмі блізка адзін ад аднаго.
Запіс відэарэгістратара напярэдадні быў перададзены Следчаму Камітэту.
Палітык Барыс Нямцоў быў забіты ў Маскве на Вялікім Маскварэцкім мосце ў ноч на 28 лютага. СК РФ распачаў крымінальную справу паводле артыкулаў «забойства» і «незаконнае абарачэнне зброі». Следства правярае некалькі версій забойства, не выключаючы, што яно было заказным.
У мінулую нядзелю, 1 сакавіка, у Маскве прайшоў жалобны марш памяці Нямцова пад лозунгам «Героі не паміраюць», удзел у якім узялі больш за 50 тысяч чалавек. Акцыі памяці таксама прайшлі ў шэрагу расейскіх гарадоў.