Газета Саўміна: Не такі ўжо народ і бедны, патрэбен падатак на нерухомасць

Газета «Рэспублiка» прапануе ўвесці дадатковы падатак на валоданне нерухомасцю.

«Калі разабрацца, не такі ўжо ў нас народ і бедны. У прыватнай уласнасці знаходзіцца блізу 200 млн квадратных метраў жылля. Гэта 100 млрд даляраў па самых сціплых падліках. А калі дадаць гаражы, лецішчы, катэджы, зямельныя надзелы... Кошт «кансалідаванай прыватнай гаспадаркі» будзе большы, чым усёй прамысловасці. Але падаткі з яго практычна не плацяцца. Затое зарабляць можна. Дасталіся ў спадчыну ад бабуль-дзядуляў кватэры-лецішчы - жыві сабе прыпяваючы, лежачы на канапе і здаючы іх у арэнду. Самыя прадпрымальныя бяруць крэдыт у банку пад заклад наяўнай уласнасці. Потым альбо прадаюць, альбо здаюць у арэнду. Ні на завод, ні ў рэальны бізнэс іх не прывабіш», - пішуць прапагандысты з газеты Саўміна «Рэспублiка».

Ад падатку не вызваляць нават пажылых людзей.

«Ужо чуем абураныя воклічы пра сацыяльны аспект: а як змогуць падатак плаціць, напрыклад, пажылыя людзі? Але ў многіх са старэйшага пакалення ёсць ва ўласнасці кватэры. Улічваючы іх рынкавы кошт, зусім беднымі гэтых людзей цяжка назваць. Ах да, амаль ва ўсіх бабуль і дзядуляў ёсць маладыя нашчадкі. Але няхай яны і ўтрымліваюць свае будучыя ўладанні.

У сацыяльна арыентаваных краінах ёсць і іншы механізм: падатак на спадчыну. Стаўкі часам драконаўскія. У Нямеччыне могуць дасягаць 70%, у Швецыі - 60%, Японіі - 50%... Праўда, ёсць істотныя «зніжкі» для блізкіх сваякоў, але такі падыход стымулюе маладое пакаленне не спачываць на лаўрах назапашванняў прашчураў, а самім круціцца. Фактычна фіскальная нагрузка на маёмасць не дазваляе тупа жыць з рэнты працаздольнаму насельніцтву.

Пара б гэтую праблему, хаця б на экспертным узроўні, прааналізаваць і ў Беларусі, каб не згубіць ініцыятыву сярэдняга пакалення. У рэшце, плацім жа мы так званы «дарожны» падатак. Логіка якога зразумелая: хочаш катацца - паўдзельнічай фінансава ў дарожным будаўніцтве. Хочаш жыць у сваім катэджы - таксама скідайся на інфраструктуру. Вядома, справядлівасць любога падатку заўсёды дыскусійная.

Але ёсць яшчэ паняцце мэтазгоднасці. Ці выцягне рэальны сектар ўсе дзяржаўныя выдаткі праз 5, 10 або 20 гадоў, калі колькасць працаздольных беларусаў скароціцца? Дарэчы, падаткі на спажыванне і валоданне маёмасцю ў некаторай ступені зніжаюць карыснасць ценявых даходаў. Купляць на імя старых бацькоў пентхаусы, паказваць мінімальны даход падатковай і будаваць трохпавярховы катэдж становіцца не вельмі выгадна. Прынамсі, цалкам ад удзелу ў напаўненні бюджэту ўцячы не ўдасца», - гаворыцца ў артыкуле.