У Баранавічах забаранілі пікет за правы працоўных
6- 1.04.2015, 16:13
- 9,768
Баранавіцкі гарвыканкам забараніў правесці пікет пад лозунгамі «Кантракты - пятля для працаўнікоў» і «Дзейнасць улады - пад грамадзянскі кантроль».
Актывіст прафзвязу РЭП Рыгор Грык меў намер правесці акцыю 4 красавіка ў Старым парку. Мэтай пікету мелася стаць інфармаванне гараджан аб парушэнні Канстытуцыі і працоўнага заканадаўства. Лозунгамі заяўляліся заклікі «Дзеянні ўлады - пад грамадзянскі кантроль», «Кантракты - пятля для працаўнікоў», «За жыццё без хлусні і фальшу».
У лісце за подпісам намесніка старшыні гарвыканкама Дзмітрыя Касцюкевіча актывісту прафзвязу паведамілі, што ў правядзенні пікету яму адмовілі, бо заяўнік не выканаў усе патрабаванні артыкула 5 закона «Аб масавых мерапрыемствах у Рэспубліцы Беларусь», прынамсі, не паказаў, што будуць ужытыя захады ў гарантаванні грамадскай бяспекі і грамадскага парадку пры правядзенні масавага мерапрыемства, піша praca-by.info.
Рыгор Грык з гэтым сцвярджэннем катэгарычна не згодны:
- Я ўклаў пісьмовыя дамовы з гарадской паліклінікай і ЖКГ, а начальнік ГАУС Герасімовіч на мой зварот пісьмова паведаміў, што пры атрыманні дазволу на правядзенне мерапрыемства Баранавіцкім гарвыканкамам аддзелам унутраных спраў са мной будзе ўкладзеная дамова аб ахове грамадскага парадку.