Заур Дадаеў заявіў, што перад затрыманнем яго выкралі

Абвінавачаны паводле справы аб забойстве палітыка Барыса Нямцова Заур Дадаеў заявіў, што перад тым, як яго затрымалі, ён быў выкрадзены.

Пра гэта паведамляе РІА «Новости».

«Я быў выкрадзены 5 сакавіка, і 7 сакавіка мне было аб'яўлена, што я затрыманы. Дзе я быў двое сутак? Што са мной было за гэтыя двое сутак? Увесь гэты час мне казалі што, дзе і як я павінен сказаць», - адзначыў фігурант справы.

Са слоў пракуратуры, ёй скаргі на ціск і выкраданне не паступалі. Следчы абяцаў агучаную інфармацыю праверыць.

Раней Дадаеў заявіў у судзе, што даў прызнальныя паказанні пад ціскам.

Таксама стала вядома, што фігурант рэзананснай справы звярнуўся па дапамогу ў «Камітэт супраць катаванняў».

Заур Дадаеў, Тамерлан Эскерханаў, Анзор і Шагіт Губашавы і Хамзат Бахаеў 8 сакавіка 2015 года былі арыштаваныя Басманным судом Масквы паводле падазрэння ў забойстве палітыка Барыса Нямцова.

Лідар расейскай апазіцыі быў забіты ў ноч на 28 лютага на Вялікім Маскварэцкім мосце ў цэнтры сталіцы. У палітыка трапілі чатыры кулі, ён памёр на месцы.

Фота: Reuters