Пажар у Хакасіі ахапіў 30 населеных пунктаў

У Хакасіі ў выніку пажараў загінулі 15 чалавек, адзін лічыцца зніклым без вестак.

Медыкі паведамляюць, што сярод загінулых ёсць дзеці. Паводле звестак Цэнтра медыцыны катастроф рэгіёну, усяго пацярпелі блізу 500 чалавек. Асноўныя траўмы - апёкі і атручванні чадным газам, піша BBC.

Прычынай пажараў, як мяркуецца, стала спальванне сухой травы, паведамляе МНС. Моцны парывісты вецер ускладніў тушэнне пажараў. Праз шматлікіх узгаранняў амаль увесь рэгіён зацягнула дымам.

Кіраўнік Хакасіі Віктар Зімін назваў сітуацыю анамальнай - у нядзелю цягам гадзіны пажары ўспыхнулі практычна на ўсёй тэрыторыі рэспублікі. Як паведамілі мясцовыя ўлады, агонь ахапіў 30 населеных пунктаў. Паводле папярэдніх звестак, згарэла 1200 дамоў, блізу дзвюх тысяч чалавек пазбавіліся жылля.

МНС разгарнула дзевяць пунктаў часовага размяшчэння людзей, якія пацярпелі ад пажараў.

У тушэнні агню, акрамя ратавальнікаў МНС, бралі ўдзел вайскоўцы, два самалёты-амфібіі Бе-200, два танкеры Іл-76, а таксама верталёты Мі-8 і Мі-26.

Таксама для барацьбы з ляснымі пажарамі прыцягнутыя 40 парашутыстаў-дэсантнікаў федэральнай авіялесааховы.

Паводле звестак МНС, цяпер усе пажары ў Хакасіі ліквідаваныя, але пажарныя і вайскоўцы застаюцца на месцах і сочаць, каб не ўзніклі новыя пажары.

Улады рэспублікі прапанавалі на час дзеяння рэжыму надзвычайнай сітуацыі забараніць продаж алкаголю.