28 сакавiка 2024, Чацвер, 17:00
Падтрымайце
сайт
Сім сім,
Хартыя 97!
Рубрыкі

Мінпрацы - беларусам: Хочаце жыць на зберажэнні - выязджайце з краіны

206

Дэкрэт аб «дармаедах» ставіць перад нялёгкім выбарам беларусаў, якія пасля многіх гадоў працы наважылі ўзяць тайм-аўт.

Ім прапаноўваюць заплаціць падатак ці... вымятацца з краіны больш чым на паўгода! На пытанне «Еўрарадыё» аб тым, ці можна жыць на заробленыя законным шляхам і назапашаныя грошы, не плацячы падатак за «дармаедства», начальніца юрыдычнай управы Міністэрства працы і сацыяльнай абароны Валянціна Маслоўская адказвае адмоўна.

Чыноўніца матывуе гэта тым, што калісьці заплачаныя падаткі, хай і вялікія, не распаўсюджваюцца на будучыню.

- Распаўсюджваць заплачаныя калісьці падаткі на будучыню нельга. Скажыце, дзе такое магчыма, у якой дзяржаве? Вы працавалі, вы плацілі падаткі, але вы гэта рабілі за той перыяд. Калі вы перасталі працаваць, то мы не можам залічыць выплачаныя падаткі на будучыню. У сваёй практыцы я яшчэ ні ў адной дзяржаве такога не сустракала, - сказала чыноўніца.

- Але такога падатку таксама няма ні ў адной дзяржаве.

- Прабачце, пытанне не ў тым, ці ёсць збор ці не. Пытанне аб удзеле ў падаткаабкладанні. Калі такога збору няма, значыць, у чымсьці іншым ёсць, у памеры падатку. Яны ў некаторых краінах даходзяць да 50%. У кожнай краіне свае магчымасці.

Пры гэтым за мяжой на заробленыя ў Беларусі грошы жыць не працуючы можна, і плаціць падатак на «дармаедства» не давядзецца. Адзіная ўмова - пацвердзіць, што адсутнічаў у Беларусі.

- Гэта значыць, калі я захачу пажыць на свае назапашаныя зберажэнні, мне трэба выязджаць за мяжу?

- Разглядаючы Дэкрэт №3, то так, вам трэба з'ехаць. Калі пражывяце ў краіне менш за 183 дні ў годзе, то будзеце вызваленыя ад збору.

Праўда, у такім выпадку беларускі бюджэт недалічыцца 20% ПДВ, які кожны плаціць, купляючы штосьці ў крамах або аплачваючы ўсе без выключэння паслугі. Гэтыя грошы застануцца за мяжой...

Нагадаем, дэкрэт N3 «Аб папярэджанні сацыяльнага ўтрыманства» Лукашэнка падпісаў 2 красавіка 2015 г.

Дэкрэтам устанаўліваецца абавязак грамадзян Беларусі, замежных грамадзян, якія стала пражываюць у нашай краіне, асоб без грамадзянства, якія не ўдзельнічалі ў фінансаванні дзяржаўных расходаў або ўдзельнічалі ў такім фінансаванні менш за 183 каляндарныя дні (паўгода) у мінулым годзе, па выплаце збору ў памеры 20 базавых адзінак.

Дэкрэт №3 абмяжоўвае магчымасці бацькоў, прымушаючы іх ісці на працу як толькі дзіцяці спаўняецца 7 гадоў.

МУС абяцае не выпускаць за мяжу неплацельшчыкаў збору на фінансаванне дзяржвыдаткаў, якія трапілі ў спісы - і беларусаў, і грамадзян іншых дзяржаў, якія пражываюць у Беларусі.

Міліцыя пагражае прыцягнуць да выплаты збору на фінансаванне дзяржвыдаткаў нават бамжоў паводле прынцыпу «перад законам усе роўныя», у тым ліку тых, што не маюць афіцыйнай рэгістрацыі.

База звестак аб абавязаных плаціць збор на фінансаванне дзяржвыдаткаў, мяркуючы з выказванняў афіцыйных асоб, будзе фармавацца ўсёй чынавенскай раццю.

Напісаць каментар 206

Таксама сачыце за акаўнтамі Charter97.org у сацыяльных сетках