Вікторыя Азаранка абыграла Місакі Доі ў паядынку Кубка Федэрацый

Вікторыя Азаранка здабыла першы бал для нацыянальнай каманды Беларусі ў матчы за выхад у другую Сусветную групу розыгрышу Кубка Федэрацый з камандай Японіі.

Сёння ў стартавым адзіночным паядынку на хардавых кортах спарткомплексу Ariake Coliseum першая ракетка беларускай каманды, якая займае 32-е месца ў сусветным рэйтынгу, упэўнена перайграла Місакі Доі (107-ы нумар сусветнага рэйтынгу) - 6: 1, 6: 2. Пасля іх згуляюць Вольга Гаварцова (136) і Курумі Нара (54), паведамляе БелТА.

Першы нядзельны паядынак стартуе ў 6 раніцы паводле менскага часу - Вікторыі Азаранцы будзе супрацьстаяць Курумі Нара. Услед за імі Вольга Гаварцова сустрэнецца з Місакі Доі. На парную сустрэчу капітан беларускай каманды Таццяна Пучак заявіла Аляксандру Сасновіч (146) і Веру Лапко (593), а капітан японак Юка Канека разлічвае на Сюко Ааяму (198) і Аюмі Марыту (451).

У пачатку лютага нацыянальная каманда Беларусі ў такім жа складзе ў Будапешце паспяхова правяла першы кваліфікацыйны этап Кубка Федэрацый, атрымаўшы права пазмагацца за выхад у другую сусветную групу. У вугорскай сталіцы беларуская каманда перамагла нацыянальныя каманды Грузіі (3: 0), Балгарыі (3: 0), Партугаліі (2: 1) і Вялікай Брытаніі (2: 0). Японскія тэнісісткі таксама ўпэўнена выступілі ў сваёй тэрытарыяльнай кваліфікацыі. У кітайскім Гуанчжоў яны атрымалі 4 «сухія» вікторыі - над тэнісісткамі Рэспублікі Карэя (3: 0), Ганконга (3: 0), Узбекістана (3: 0) і Казахстана (2: 0).

Раней беларускія тэнісісткі толькі аднойчы сустракаліся з японкамі ў розыгрышы Кубка Федэрацый. У 1999 годзе нацыянальная каманда Беларусі, за якую выступалі Наталля Зверава і Вольга Барабаншчыкава, абыгралі спаборніц з лікам 2: 0 на кваліфікацыйным матчы другой Сусветнай групы. Цяпер у камандным жаночым рэйтынгу нацыянальная каманда Беларусі займае 19-е месца, а яе спаборніцы знаходзяцца на 15-й пазіцыі. Апошнім разам нацыянальная каманда Беларусі гуляла ў другой Сусветнай групе ў 2012 годзе, але саступіла камандам ЗША (0: 5) і Швэйцарыі (1: 4).

Акрамя матчу ў Токіё ў наступны ўік-энд пройдуць яшчэ 3 сустрэчы за выхад у другую Сусветную групу Кубка Федэрацый: Сербія - Парагвай, Славаччына - Швецыя, Аргенціна - Гішпанія.