«БелАЗ» без кіроўцы ўпершыню выехаў на выпрабавальны палігон

Самаскід можа перавозіць да 130 тон выкапняў, пры гэтым яму абсалютна не патрабуецца рука чалавека.

Вялікагруз працуе на маршруце, які зараней прарабілі яго родзічы, і кіруецца кампутарам. І гэта не адзіная з прэзэнтаваных распрацовак, перадае тэлеканал ОНТ.

На тое, каб навучыць велізарную машыну працаваць самастойна, канструктары завода аддалі шэсць гадоў. Спачатку перайшлі на дыстанцыйнае кіраванне, калі кіроўца ўсё ж удзельнічаў у працэсе, але на адлегласці. Ну, а цяпер БелАЗ можа самастойна заладоўваць і выладоўваць да 130 тон і выходзіць на самыя складаныя маршруты.

«У гэтым выпадку адсутнасцю ў патэнцыйнай зоне небяспекі чалавека мы тым самым падвышаем бяспеку вытворчасці за кошт выключэння небяспечных чыннікаў. Такіх як загазаванасць, запыленасць, не выключаныя і радыеактыўныя павышаныя фоны», - кажа Яўген Гучак, начальнік бюро электронных сістэм кіравання галоўнага канструктара Беларускага аўтамабільнага завода.

Упершыню паказалі і напарніка беспілотнага волата - самы вялікі ў гісторыі завода пагрузчык. Ва ўсякіх кар'ерных варунках яго коўш падыме да 22 тон і заладуе самаскід хутка, ашчадна, а значыць, і выгадна.

«Гэта ўнікальная канструкцыя, больш такой у свеце няма. З улікам таго, што сістэма дазваляе кіраваць кожным колам, у залежнасці ад таго, якая счэпная характарыстыка ў яго. Гэта дазваляе мець больш высокія цягавыя характарыстыкі і характарыстыкі, патрэбныя менавіта для ўгрызання ў грунт і набірання матэрыялу ў коўш», - распавёў Аляксандр Ягораў, генеральны канструктар Беларускага аўтамабільнага завода.

Першымі гледачамі ўнікальнага ў беларускім машынабудаванні экспэрымэнту сталі ўдзельнікі навукова-тэхнічнай канферэнцыі, якая праходзіць гэтымі днямі на прадпрыемстве - 300 экспэртаў, якія прадстаўляюць краіны ад блізкага замежжа да Лацінскай Амэрыкі.