Арэнда менскіх офісаў можа патаннець яшчэ на 10%

Сярэдні час экспазіцыі офісных памяшканняў у Менску павялічыўся практычна ўдвая - з 3-4 месяцаў у 2014 годзе да 5-6 месяцаў цяпер.

У сувязі з гэтым арэндныя стаўкі могуць апусціцца яшчэ на 7-10%. Пра гэта charter97.org распавяла кіраўніца праектаў адміністрацыйнай нерухомасці «Твая сталіца. Нерухомасць для бізнэсу» Наталля Новікава.

Попыт на офісныя памяшканні ў сталіцы не паспявае за прапановай. Рэкордныя аб'ёмы ўводу новых плошчаў і эканамічныя цяжкасці ўзмацняюць канкурэнцыю сярод рыэлтараў і ўскладняюць запаўненне новых бізнэс-цэнтраў. Рынак цяпер на баку арандатара: маючы шырокі выбар, кампаніі імкнуцца пераязджаць у больш якасныя аб'екты з гнуткай арэнднай палітыкай.

«Рыэлтары разлічвалі на развіццё бізнэсу і прыход міжнародных карпарацый. Але іх прагнозы былі залішне аптымістычнымі: попыт, у адрозненне ад прапановы, застаўся на ранейшым узроўні, рынак быў не гатовы да 170 тысяч кв м плошчаў, якія плануецца ўвесці да канца года. Некаторыя забудоўшчыкі ўжо пачынаюць пераглядаць свае планы», - адзначыла экспэрт.

Складаней за ўсё запаўняюцца новыя адміністрацыйныя аб'екты C-класа. Попыт на іх прыкметна знізіўся, тады як прапанова ўпэўнена расце. Многія новабудоўлі гэтага класа, значна саступаюць у якасных характарыстыках бізнэс-цэнтрам катэгорыі «B», застаюцца незапатрабаванымі. У выніку сярэдняя арэндная стаўка на аб'екты класа «C» з пачатку года знізілася на 26% - да 12,3 еўра з ПДВ за кв м.

Больш запатрабаваныя на рынку аб'екты класаў «A» і «B», але і тыя з пачатку года патаннелі для арандатараў на 11% і 13% адпаведна. Цяпер за «квадрат» у офісах А-класа просяць у сярэднім 26,4 еўра з ПДВ, B-класа - 17,3 еўра.

Пры гэтым рынак захоўвае падвышаную цікавасць да знакавых аб'ектах класаў «A» і «B». Сярод іх - новы 26-павярховы офісны будынак у складзе МФК «Тытан» каля станцыі метро Пятроўшчына, бізнэс-цэнтр са SPA Riviera Plaza на праспекце Пераможцаў, «Арлан» паблізу парку Дружбы народаў, комплексы «На гандлёвай набярэжнай» і «Mercure» ў гістарычным цэнтры горада. «У гэтых аб'ектах прадугледжана спалучэнне офіснай прасторы з гандлёвымі, забаўляльнымі ці рэкрэацыйнымі цэнтрамі, што станоўча ўспрымаецца арандатарамі. У будучыні рынак будзе павялічвацца за кошт такіх комплексаў», - мяркуе экспэрт.

Найлепшыя ўмовы для арандатараў звычайна прапануюць уладальнікі нядаўна пабудаваных бізнэс-цэнтраў. Яны зацікаўленыя як мага хутчэй запоўніць аб'ект, таму гатовыя зніжаць стаўкі і прапаноўваць арэндныя вакацыі на некалькі месяцаў. «Дэвелаперы цяпер імкнуцца быць бліжэй да арандатараў. Бо нават для запаўнення якасных аб'ектаў, памяшканні ў якіх яшчэ год-два таму назад разышліся б за пару месяцаў, даводзіцца прыкладаць сур'ёзныя намаганні», - патлумачыла Наталля Новікава.

Найбліжэйшыя месяцы арэндныя стаўкі могуць знізіцца яшчэ на 7-10%. «Да восені стаўкі могуць апусціцца. Разам з тым значных зменаў не чакаецца. Рынак блізкі да таго, каб намацаць «дно». Імаверней за ўсё, у верасні-кастрычніку сітуацыя стабілізуецца, пасля чаго стаўкі калі і будуць змяняцца, то ў межах 1-2%», - падкрэсліла прадстаўніца «Твая сталіца. Нерухомасць для бізнэсу».

Асноўнымі чыннікамі выбару бізнэс-цэнтра ў Менску выступаюць яго месцазнаходжанне, планаванне і велічыня арэндных ставак. Многія кампаніі таксама звяртаюць увагу на наяўнасць падземнага паркінга і вялікай гасцявой паркоўкі (з гэтым праблемы амаль у кожнага бізнэс-цэнтра ў цэнтры горада). Акрамя таго, больш прывабным аб'ект робяць адзіная кіроўная кампанія, магчымасць 24-гадзіннага доступу і выгаднае суседства, у тым ліку з аддзяленнем банка, фітнэс-залай і рэстарацыяй. Сучаснага арандатара якасць офіса цікавіць не менш, чым узровень ставак.