Пры мяжы Латвіі заўважаны расейскі вайсковы самалёт
1- 28.04.2015, 14:19
- 9,439
Паблізу паветранай прасторы Латвіі зафіксаваны палёт расейскага вайсковага самалёта.
З такім сцвярджэннем выступілі Нацыянальныя ўзброеныя сілы балтыйскай краіны, паведамляе ІТАР-ТАСС.
"Сёння патрульныя самалёты над нейтральнымі водамі Балтыйскага мора каля вонкавай марской мяжы Латвіі ідэнтыфікавалі самалёт ВПС Расеі Іл-76", - гаворыцца ў паведамленні.
У панядзелак увечары узброеныя сілы краіны таксама заявілі аб расейскім вайсковым караблі паблізу мяжы Латвіі.
"У латвійскай эксклюзіўнай эканамічнай зоне ў 8,6 марскіх мілях ад тэрытарыяльных вод НВС 27 красавіка ідэнтыфікавалі расейскі карабель класа "Тарантул", - сцвярджаюць Нацыянальныя ўзброеныя сілы.
Паводле апублікаваных раней звестак міністэрства абароны Латвіі, у 2014 годзе на прымежнай тэрыторыі істотна ўзрасла актыўнасць паветраных і марскіх суднаў, якія належаць расейскім Узброеным сілам.
Вайсковыя самалёты і караблі РФ, паводле сцвярджэння ведамства, набліжаліся да межаў краіны больш за 250 разоў.