Парад у Менску абыдзецца ў $1,3 мільёна?

Са слоў вайскоўцаў, калі б параду не было, гэтыя грошы ўсё роўна б сышлі на трэніроўкі войска.

Пытанне кошту параду падымаецца кожны раз перад гэтай урачыстай падзеяй. Аднак дакладную суму ніколі не агучвалі. Чатыры гады таму кошт параду назвалі ў каўбасе, піша «Комсомольская правда в Беларуси».

- Мы спецыяльна палічылі, як можна было б выкарыстоўваць сродкі, якія выдзяляюцца ў рамках вайсковага бюджэту на парад войскаў, - пісаў у сваім артыкуле, апублікаваным у 2011 годзе ў «Беларускай вайсковай газеце», начальнік управы інфармацыі галоўнай управы ідэалагічнай працы Мінабароны палкоўнік Уладзімір Макараў. - Высвятляецца, прапанаваная імі эканомія сродкаў дастатковая, каб выдаць не больш чым па 10 грамаў каўбасы кожнаму жыхару рэспублікі.

Чыноўнік тады не ўдакладніў, які менавіта гатунак каўбасы ўлічваўся пры падліках, пры гэтым адзначыў, што гаворка ідзе пра самую танную каўбасу.

Сёння ён агучыў новую інфармацыю, якая дазволіла «Камсамолцы» палічыць больш дакладны кошт.

- Сэнс парада і яго кошт палягае ў пераемнасці традыцый, найвышэйшым маральным духу, патрыятызме, гонары за нашу вялікую гісторыю і добрае стаўленне да перамогі, - заявіў Уладзімір Макараў. - Што тычыцца сум, то мы можам казаць толькі аб умоўным кошце параду. Таму што па-за залежнасцю ад канкрэтных формаў вайсковай дзейнасці ў частцы выканання дзяржаўных задач, на год вайсковаму ведамству вылучаецца пэўная сума сродкаў, у рамках якой і праводзяцца ўсе мерапрыемствы. Гэтыя сродкі цягам апошніх гадоў не перавышаюць 1% ВУП. Што тычыцца кошту параду, то з досведу папярэдніх гадоў на яго губляецца менш 0,2% тых сродкаў, якія вылучаюцца вайсковаму ведамству. Па-за залежнасцю ад наяўнасці параду, вайскоўцы ўсё роўна б займаліся баявой падрыхтоўкай, тэхніка б выкарыстоўвалася для вучэбна-баявой дзейнасці, харчавання, перавозкі і ўсяго астатняга.

Паводле звестак Нацыянальнага банка Беларусі, у 2014 годзе ВУП нашай краіны склаў 778,4 трыльёна рублёў - гэта прыкладна 65,7 мільярда даляраў (паводле курсу на канец мінулага года). Гэта значыць, што на патрэбы вайсковага ведамства летась вылучылі прыкладна 657 млн даляраў (1% ад ВУП). Значыць, кошт параду прыкладна складае 1,3 мільёна даляраў (0,2% ад сродкаў, што выдзяляюцца на вайсковыя патрэбы).