Украіне ды Грузіі паабяцалі бязвізавы рэжым з ЕЗ

ЕЗ гатовы надаць бязвізавы рэжым Украіне ды Грузіі ў выпадку, калі будзе станоўчая справаздача Еўракамісіі ў канцы гэтага года.

Пра гэта гаворыцца ў супольнай заяве паводле вынікаў саміту "Усходняга партнёрства" ў Рызе, піша "Корреспондент".

"Вітаем прагрэс, дасягнуты Грузіяй ды Украінай у рэалізацыі іх планаў дзеянняў для лібералізацыі візавага рэжыму з ЕЗ, што паказана ў апошніх справаздачах Еўракамісіі аб дасягнутым прагрэсе", - гаворыцца ў заяве.

Удзельнікі саміту адзначылі, што чакаюць заканчэння Украінай ды Грузіяй рэалізацыі 2-га этапа планаў лібералізацыі візавага рэжыму, а таксама справаздачы Еўракамісіі аб праведзенай працы.

У заяве адзначаецца, што пасля гэтага камісія прапануе Еўрапарламенту і Радзе скасаваць візавы рэжым для грамадзян Украіны ды Грузіі.

У заяве таксама гаворыцца, што дзеянне зоны свабоднага гандлю паміж Украінай і Еўразвязам пачнецца з 1 студзеня 2016 года. "Удзельнікі саміту з нецярпеннем чакаюць папярэдняга ўвядзення глыбокай і ўсёабдымнай ЗСГ з Украінай, пачынаючы з 1 студзеня 2016 і станоўчага эфекту ад яе рэалізацыі", - гаворыцца ў супольнай заяве.

У заяве адзначаецца важнасць канструктыўных трохбаковых кансультацый у рэалізацыі ЗСГ Украіна-ЕЗ, а таксама вітаюцца тэмпы ратыфікацыі гэтага пагаднення краінамі-чальцамі ЕЗ.

Удзельнікі саміту заклікалі астатнія краіны ЕЗ ратыфікаваць Пагадненне Украіна-ЕЗ, каб яно цалкам увайшло ў дзеянне. Акрамя таго, у заяве гаворыцца, што ЕЗ прызнае еўрапейскі выбар ды імкненне краін-партнёраў, якія падпісалі Пагаднення аб асацыяцыі. "Удзельнікі саміту прызнаюць еўрапейскія памкненні і еўрапейскі выбар зацікаўленых партнёраў, як гэта паказана ў пагадненне аб асацыяцыі", - гаворыцца ў заяве.

Удзельнікі саміту прызналі, што дэмакратыя, павага да правоў чалавека і асноўных свабод, вяршэнства права ляжаць у аснове палітычнай асацыяцыі і эканамічнай інтэграцыі, як гэта прадугледжана ў пагадненне аб асацыяцыі. "Яны прызнаюць прыхільнасць зацікаўленых партнёраў да рэалізацыі і прасоўвання гэтых каштоўнасцяў", - сказана ў дакуменце.