Малдова не прапусціць у Прыднястроўе «зялёных чалавечкаў»

Улады Малдовы перакрылі расейскім вайскоўцам магчымасць дабірацца да Прыднястроўя.

Аэрапорт Кішынёва заставаўся адзінай легальнай магчымасцю для расейцаў дабірацца да Прыднястроўя пасля пастановы Вярхоўнай Рады дэнансаваць дамову аб транзіце вайскоўцаў і вайсковых грузаў з Расеі праз тэрыторыю Украіны. Аднак, як паведамляе газета «Коммерсант», толькі цягам апошніх двух тыдняў у кішынёўскім аэрапорце былі затрыманыя, а пазней дэпартаваныя на радзіму адразу трое расейцаў, у тым ліку і сяржант-кантрактнік.

Паводле звестак выдання, з кастрычніка 2014 года з Малдовы былі дэпартаваныя блізу сотні вайскоўцаў - грамадзян Расеі.

У Кішынёве сцвярджаюць, што гатовыя прапускаць вайскоўцаў, калі Масква будзе за месяц апавяшчаць аб іх прыездзе. Тых, хто прылятае без папярэджання, Малдова змяшчае ў спіс «непажаданых». Адпаведную заяву МЗС краіны перадало ў Маскву праз дыпламатычныя каналы.

Малдова не прызнае абмежаваную групу расейскіх войскаў (АГРВ), якая знаходзіцца ў Прыднястроўі, міратворцамі, настойваючы на іх вывадзе з самаабвешчанай «рэспублікі». Пры гэтым спробы жаўнераў трапіць у Прыднястроўе выклікаюць незадаволенасць у Кішынёве. Апошні скандал быў звязаны з палкоўнікам Дзмітрыем Зелянцовым, які наважыў пазбегнуць праблем пры перасячэнні мяжы і выдаў сябе за «міратворца», аднак, прыбыўшы ў Прыднястроўе, узначаліў менавіта АГРВ.