Якім прадпрыемствам пагражае нацыяналізацыя?
4- 25.05.2015, 10:21
- 3,225
Крызісную сітуацыю, у якой выявіліся некаторыя бізнэсоўцы ў Беларусі, улады могуць выкарыстоўваць для правядзення чарговай хвалі нацыяналізацыі.
Якія прадпрыемствы дзяржава можа адабраць у прыватных інвестараў?
Паводле інфармацыі «Заўтра тваёй краіны», цяпер абмяркоўваецца пытанне аб вяртанні ва ўласнасць дзяржавы некалькіх прадпрыемстваў, якія раней былі прыватызаваныя прыватнымі інвестарамі.
Мэтазгоднасць гэтага кроку тлумачаць неэфектыўным кіраваннем. У такіх варунках дзяржава не можа заставацца ў баку.
Як атрымалася высветліць «Заўтра тваёй краіны» ў некалькіх крыніцах, адзін з магчымых кандыдатаў на вяртанне ва ўлонне дзяржавы - завод «Мотавела».
У 2007 годзе адзін з найбуйнейшых у СНД вытворцаў матацыклаў і ровараў быў прыватызаваны з удзелам зарэгістраванай у Аўстрыі кампаніі ATECHolding. Яе асноўным уладальнікам называецца вядомы ў Беларусі бізнэсовец Аляксандр Мураўёў.
ATEC абавязалася захаваць профіль прадпрыемства і інвеставаць у яго развіццё 20 млн даляраў. Планавалася, што да канца 2012 года магутнасці складуць 500 тысяч ровараў і 30 тысяч матацыклаў у год.
Аднак гэтыя планы не былі выкананыя, прадпрыемства завінавацілася ў крэдытах. Крызісная сітуацыя стала падставай для візіту на завод у канцы 2013 года Аляксандра Лукашэнкі. Паводле ягоных вынікаў прэзідэнт распарадзіўся «апошнім разам падставіць плячо», загадаўшы адтэрмінаваць выплату крэдытаў. Але, мяркуючы з усяго, гэтых захадаў было недастаткова.
Фінансавыя праблемы адчуваюць і іншыя прадпрыемствы ATECHolding у Беларусі. Некаторыя з іх прызнаныя банкрутамі.
У траўні 2014 года Эканамічны суд Гомельскай вобласці распачаў справу аб эканамічнай неплацежаздольнасці СЗАТ «Гомельскі шклатарны завод», у якое таксама інвеставаў Мураўёў. У канцы кастрычніка мінулага года была прынятая пастанова аб ліквідацыі гэтай юрыдычнай асобы.
Летась справа аб банкруцтве была распачатая таксама ў дачыненні да ЗТАА «Еліпак», якая займаецца выпускам упакоўкі. Ужо ў пачатку 2015 Эканамічны суд Гарадзенскай вобласці распачаў чарговую справу аб банкруцтве прадпрыемства, у якое інвеставаў ATEC, - лідскага вытворцы бутэлек СЗАТ «Белеўрата».
Як адзначаюць экспэрты «Заўтра тваёй краіны», дзяржава не можа быць зацікаўленай у тым, каб у гэты складаны час павесіць на сябе праблемнае прадпрыемства. Хутчэй за ўсё, будзе зробленая спроба знайсці новага інвестара. У 2006-2007 гадах цікавасць да «Мотавела», прынамсі, праяўляў холдынг Аляксандра Шакуціна «Амкадор».