ДАІ заклікае кіроўцаў уключыць фары
12- 25.05.2015, 11:15
- 4,485
Аперацыю «Увага - дзеці!» правядуць з 25 траўня да 5 чэрвеня супрацоўнікі сталічнай Дзяржаўтаінспекцыі.
Пра гэта паведамляюць «Минск-Новости».
Як распавяла начальніца аддзела агітацыі і прапаганды ДАІ ГУУС Мінгарвыканкама Жанна Юран, інспектары ДАІ наведаюць дзіцячыя дашкольныя і сярэднія навучальныя ўстановы.
Сумесна з камітэтам адукацыі Мінгарвыканкама арганізуюцца розныя акцыі прафілактыкі ДТЗ, у тым ліку з прыцягненнем бацькоў. Запланаваныя выступленні інспектараў у працоўных калектывах і аўташколах горада.
У сувязі з заканчэннем навучальнага года і пачаткам летніх канікул запланаваны шэраг прафілактычных мерапрыемстваў для дзяцей і падлеткаў, сярод якіх творчыя конкурсы, віктарыны, велаэстафеты і прабегі, алімпіяды і фінальны этап Рэспубліканскага злёту-конкурсу атрадаў юных інспектараў дарожнага руху, які пройдзе з 26 да 30 траўня ў Менску.
Дзяржаўтаінспекцыя заклікае кіроўцаў быць вельмі ўважлівымі пры руху паблізу дзіцячых устаноў, праездзе нерэгулюемых пешаходных пераходаў, прыпынкаў грамадскага транспарту і ў дварах.
У дні правядзення аперацыі кіроўцы абавязаны перасоўвацца ў светлы час дня з уключаным на транспартным сродку блізкім святлом фар.