Пад Столінам маланка спаліла капліцу XIX стагоддзя
- 27.05.2015, 12:22
- 11,814
У Берасцейскай вобласці за мінулы дзень праз навальніцу адбылося пяць пажараў.
Пра гэта распавёў прэс-сакратар Берасцейскага абласнога ўпраўлення МНС Сяргей Машноў, паведамляе БелаПАН.
27 траўня а 1.22 у вёсцы Сіцыцк Столінскага раёна праз маланку загарэлася капліца Пакрова Прасвятой Багародзіцы. У выніку драўляная капліца, пабудаваная ў XIX стагоддзі, знішчана агнём.
Чатыры навальнічныя ўзгаранні былі зарэгістраваны 26 траўня з 21.15 да 23.45.
У Столінскім раёне ў вёсцы Вулька-Арея агонь знішчыў дах і пашкодзіў перакрыцце жылога драўлянага дома 64-гадовага пенсіянера, у вёсцы Гародная - знішчыў дах, пашкодзіў перакрыцце і маёмасць у доме 57-гадовай жанчыны.
У Століне праз маланку адбыўся пажар у жылым цагляным доме, які належыць 56-гадоваму мужчыну. Агнём пашкоджаны дах.
У Берасці навальнічным пажарам знішчаны дах цаглянай гаспадарчай пабудовы і маёмасць у ёй, што належаць 68-гадовай мясцовай жыхарцы.
Падчас пажараў ніхто не пацярпеў.
Як адзначыў Машноў, 20 траўня ў Берасцейскай вобласці праз маланку адбылося чатыры пажары, усе - у прыватным сектары. Пацярпелых няма.