Кошты на Камароўцы: чарэшня - 250 000, бананы - 150 000

Кошты свежай садавіны і ягад пакуль здзіўляюць. Кілаграм чарэшні абыдзецца ад 220 да 250 тысяч рублёў.

Агенцтва «Мінск-Навіны» даведалася, калі менчукам чакаць зніжэння коштаў.

- Чаму ў гэтым годзе такія «завоблачныя» кошты? У мінулым у такі ж час чарэшня каштавала максімум 150 тысяч рублёў...

- Розніца напраўду не такая велізарная, як вам здаецца, - усміхаецца ў адказ прадавачка Камароўскага рынку Ксенія. - Вядома, мінімальныя зрухі ёсць - не будзем забываць, што курс даляра вырас. Але першая чарэшня, як і ўсякія іншыя замежныя садавіна ды ягады, заўсёды даволі дарагая. Кошт заўсёды залежыць ад якасці тавару, а таксама ад краіны-вытворцы.

Ёсць і яшчэ адзін фактар цэнаўтварэння - партыя тавару. На адным з прылаўкаў заўважаем рэкордна нізкі (у параўнанні з астатнімі) кошт чарэшні - 100 тысяч рублёў за кілаграм.

- Начальства так вызначыла, - з усмешкай каментуе анамальна нізкі кошт прадавачка Алеся. - Хутчэй за ўсё, прыйшла вялікая партыя тавару. Чарэшня ў нас з Грэцыі, крыху пазней будзе з Малдовы і Узбекістана. Кошт, само сабой, будзе зніжацца з набліжэннем сезона. Кілаграм малдаўскай ягады можна будзе купіць прыкладна за 60 тысяч рублёў.

Усе прадаўцы аднадушна запэўніваюць - у сезон кошты садавіны-ягады ўпадуць ў 2-3, а то і ў 4 разы. Пачакайце, а цяпер яшчэ не сезон? Высвятляецца, што не. Нягледзячы на разнастайнасць тавару чарэшня, абрыкосы, нектарыны, персікі пакуль экзотыка.

- Сезон гэтых культур пачынаецца арыентыровачна з сярэдзіны чэрвеня, - дадае начальніца змены сезоннага рынку КТУП «Менскі Камароўскі рынак» Наталля Сінюковіч. - А вось клубніцы ўжо не ўваходзіць у разрад экзатычнага тавару - іх даволі шмат на прылаўках.

Салодкі клубнічны водар, сапраўды, казыча нос. Малдова, Польшча, Грэцыя, нават ягаду сербскага паходжання можна адшукаць. Кошт прыблізна 50-60 тысяч рублёў, але самая дарагая - ад айчыннага вытворцы.

- Папулярнасць беларускай трускалкі вышэйшая за замежную - у яе больш натуральны густ. Падвышаны кошт аргументаваны не толькі попытам, але і колькасцю - нашай ягады на прылаўках яшчэ вельмі мала. Большасць клубнічных палёў яшчэ ў стадыі цвіцення. Я, да прыкладу, наступны ўраджай буду збіраць толькі праз 5 дзён. Чым бліжэй да асноўнага сезону, тым ніжэйшы будзе кошт. У мінулым годзе, да прыкладу, ён упаў з 50 тысяч да 15 тысяч рублёў, - адзначае ўладальнік падсобнай гаспадаркі ў Драгічыне Эдуард.

Ужо цяпер на прыкладзе гародніны бачныя характэрныя зрухі.

- У мінулую пятніцу кілаграм агуркоў каштаваў дзесьці 20-22 тысячы рублёў. Сёння - ужо 10-12 тысяч рублёў. Галоўны «спонсар» - Пінскі раён. З найбліжэйшых пастаўшчыкоў гародніны - агракамбінат «Ждановічы» і Менская агароднінная фабрыка, - каментуе начальніца змены сезоннага рынку Наталля Сінюковіч.