Google прэзентавала новую версію Android

28 траўня ў Сан-Францыска стартавала традыцыйная штогадовая канферэнцыя Google I/O для распрацоўнікаў.

Для карыстальнікаў акцыя цікавая перш за ўсё тым, што амерыканская інтэрнэт-карпарацыя прэзентуе на ёй новыя праграмныя прадукты. Сёння кампанія анансавала аперацыйную сістэму Android М, паведамляе onliner.by.

Вітаючы прысутных, старэйшы віцэ-прэзідэнт Google Сундар Пінчаі заявіў, што ў мінулым годзе 8 з 10 рэалізаваных смартфонаў працавалі пад кіраваннем Android. Топ-мэнэджар падкрэсліў важнасць развіцця мабільных тэхналогій і перадаў слова тэхнічнаму дырэктару платформы Android Дэйву Бурку.

Распавядаючы пра новую версію мабільнай АС, Дэйв Бурк адзначыў, што цяпер дадаткі будуць пытаць дазвол на доступ да функцый сістэмы не падчас устаноўкі, а пры выкарыстанні праграм. Напрыклад, пры запуску Instagram дадатак запытае доступ да камеры, а навігацыйнае ПА - да GPS. Аналагічным чынам рэалізаваны доступ да асабістых звестак у iOS.

Карыстальнік можа праглядзець спіс усіх дадаткаў, якія маюць доступ да той ці іншай функцыі.

Затым Google прэзентавала ўласную сістэму бескантактавых мабільных аплат Android Pay, падобную да Apple Pay. Уладальнікі смартфонаў з чыпам NFC змогуць аплачваць набыткі, падносячы прыладу да тэрмінала. Навінка падтрымлівае асноўныя аплатныя сістэмы і будзе працаваць у 700 тысячах амерыканскіх крам.

Сярод іншых новаўвядзенняў у Android М - функцыя наўпроставай перадачы файлаў накшталт Air Drop, а таксама спрошчанае кіраванне гукам.

У Android M на сістэмным узроўні рэалізавана падтрымка сканэра адбіткаў пальцаў. Цяпер распрацоўнікам будзе прасцей выкарыстаць магчымасці дактыласкапічных датчыкаў у смартфонах ад розных вытворцаў.

Яшчэ адно новаўвядзенне - разумная функцыя пад назвай Doze. Яна ўмее эканоміць энэргію акумулятара, абапіраючыся на паказчыкі розных сэнсараў. Напрыклад, пры працяглай адсутнасці руху (што пацвердзіць акселерометр) тэлефон выгрузіць з аператыўнай памяці большасць дадаткаў. Званкі і паведамленні застануцца актыўнымі.