Намаляваны на фургоне твор Бэнксі выставілі на продаж

Папярэдняя ацэнка - 400 тысяч фунтаў (550 тысяч еўраў).

Твор вулічнага мастака Бэнксі «Маўклівая большасць» (Silent Majority), намаляваны на фургоне ў канцы 1990-х, будзе прададзены на аўкцыёне Drouot у Парыжы.

Пра гэта піша Lenta.ru са спасылкай на выданне Express.

Графіці было зробленае падчас музычнага фэсту "Гластанбэры" на адным з фургонаў, у якім жылі госці імпрэзы. Яны распавядаюць, што Бэнксі і ягоны суаўтар Інкі пацікавіліся, ці могуць яны размаляваць адзін з бартоў іхняга трэйлера. Праца заняла ў мастакоў тры дні.

«Сэнс «Маўклівай большасці» ў тым, каб паказаць апагей рэйв-вечарын і хіп-хоп-сцэны таго часу», - тлумачаць уладальнікі размаляванага аўтамабіля.

На цяжкавіку напісаныя фразы «Маўчанне - далікатная рэч», «Не варта занадта спадзявацца на маўчанне», «Адзін моцны гук, і пачнецца». Гэта адно з першых графіці Бэнксі, аб якім раней не было вядома, і самае вялікае.

Бэнксі - брытанскі вулічны мастак, асоба якога не высветленая. Ягоныя графіці сталі з'яўляцца на вуліцах з пачатку 1990-х гадоў. Цяпер творы Бэнксі ацэньваюцца на мільёны даляраў і значна павялічваюць кошт нерухомасці, на якіх размешчаны, таму іх псаванне кваліфікуецца як вандалізм. За «фірмовы стыль» Бэнксі ўважаецца выкарыстанне трафарэтаў. Пра жыццё ананімнага мастака зняты фільм «Выйсце праз сувенірную краму».