Следства паводле справы Саўчанкі падоўжанае да 13 лістапада

Следчы камітэт Расеі падоўжыў следства паводле справы выкрадзенай украінскай лётчыцы і народнага дэпутата да 13 лістапада, якая ўтрымліваецца ў расейскай турме.

Пра гэта ў "Tвиттере" паведаміў адвакат Мікалай Полазаў, які абараняе Надзею Саўчанку.

"СК падоўжыў тэрміны следства паводле справы Надзеі Саўчанкі да 13 лістапада 2015 года. На 6 месяцаў, - напісаў адвакат. - Галоўная задача расейскай улады ў справе Саўчанкі не расследаваць справу, а зламаць дух Надзеі, зламаць дух Украіны".

Надзея Саўчанка была выкрадзеная баевікамі на Данбасе летам 2014 года, а затым яе перавезлі ў Расею, дзе абвінавацілі ў датычнасці да гібелі расейскіх журналістаў. У той жа час, паводле звестак абароны, яна не магла быць датычнай да гібелі журналістаў, бо трапіла ў палон яшчэ да іх смерці. У снежні 2014 Надзея Саўчанка абвясціла галадоўку на знак пратэсту супраць свайго незаконнага арышту. 24 красавіка Следчы камітэт РФ выставіў ёй канчатковае абвінавачванне ў нібыта дапамаганні забойства дзвюх і больш асоб і ў незаконным перасячэнні мяжы РФ.