Беларусы масава вывозяць з Украіны прадукты і бытавую тэхніку
65- 27.06.2015, 9:45
- 32,088
Украінская каўбаса перамагла расейскі тэлевізар.
На рынках і ў крамах памежных украінскіх гарадоў усё часцей можна ўбачыць нашых суайчыннікаў. Так у Чарнігаве гамяльчане масава скупляюць садавіну і гародніну ўкраінскай вытворчасці, паведамляе тэлеканал «Белсат».
«Садавіна, вось, купілі чарэшні, памідораў, агуркоў... Таму што ўсё свежае і добрае», - кажа адзін з беларусаў-пакупнікоў у Чарнігаве.
Чым жа нядобра купляць беларускія агуркі і памідоры? Ды і наогул беларускае? Галоўная прычына - кошты.
У барацьбе лядоўні з тэлевізарам рашучы ўдар па расейскай прапагандзе нанёс беларускі эканамічны цуд. Калі кошты на айчынныя прадукты адчувальна выраслі, беларусы з памежных рэгіёнаў сталі значна менш баяцца міфічных бандэраўцаў, пра якія так шмат казалі крамлёўскія тэлеканалы.
«Цяпер аўтобусаў шмат ходзіць. Спачатку баяліся, а цяпер адзін, другі аўтобус, па 10-20 машын. Нармальна едуць», - адзначае адзін з мясцовых прадаўцоў.
Дзякуючы беларусам зноўку ажылі і зусім маленькія памежныя ўкраінскія мястэчкі. Гэта Зарэчная, Роўненская вобласці. Па серадах, калі працуе мясцовы рынак, зарэчанцы са світання сустракаюць таварамі нашэсце пінчукоў.
Набываюць і сала, і каўбасы, якія трэба везці кантрабандай. Прычыны тыя ж - нізкія кошты і больш шырокі выбар. А на выходных беларусы ідуць ва ўкраінскія крамы за бытавой тэхнікай. Змятаюць з прылаўкаў усё.
Але нават на рынку прыкметная вялікая розніца паміж брацкімі народамі. «Яны жывуць у Савецкім саюзе. Яны ніколі не гавораць пра палітыку. Яны баяцца», - падкрэслівае ў гутарцы з «Белсатам» гандляр на рынку.
Бо пра палітыку казаць - гэта не каўбасу кантрабандай вазіць. Страшнавата з непрывычкі.