Пад выглядам «сэканд-хэнда» ў Беларусь спрабавалі завезці тону новага адзення

Дзякуючы пільнасці спецыялістаў Віцебскай мытні канфіскавана партыя адзення і галантарэйных вырабаў агульнай вагой больш як 880 кілаграмаў.

Пра гэта сайту charter97.org паведамілі ў прэс-службе Дзяржаўнага мытнага камітэта.

У пункце пропуску «Урбаны» падчас правядзення спецыяльнага мерапрыемства супрацоўнікамі аператыўна-пошукавага аддзела Віцебскай мытні быў прыпынены рух грузавога аўтамабіля MAN, які рухаўся з Латвіі ў Беларусь.

- Паводле дакументаў, у аўтамабілі перамяшчалася адзенне, былое ва ўжыванні, - так званы «сэканд-хэнд», - распавялі мытнікі. - У выніку агляду ў аўтамабілі сярод адзення, былога ва ўжыванні, было выяўлена больш за 2 тыс. адзінак новага адзення і галантарэйных вырабаў - сумак, рамянёў, якія мелі фабрычныя этыкеткі і не заяўленыя у суправаджальных дакументах. Агульная вага нелегальнага тавару склала 883 кілаграма.

Незаконна ўвезены тавар ацэначным коштам Br360 млн канфіскаваны. Мытняй распачаты адміністрацыйны працэс.