Іосіф Шагал: Бязвізавы рэжым з Беларуссю кнэсет можа зацвердзіць у ліпені
- 30.06.2015, 14:08
- 7,790
Міністр унутраных спраў Ізраіля Сільван Шалом падпісаў 29 чэрвеня ўказ аб палягчэнні візавага рэжыму з Беларуссю.
Як паведаміў БелаПАН амбасадар Ізраіля ў Беларусі Іосіф Шагал, падпісанне ўказа - гэта першы з этапаў паслаблення візавага рэжыму паміж дзвюма краінамі.
«Наступны этап - зацвярджэнне пастановы аб бязвізавых паездках галасаваннем у кнэсеце, праз 90 дзён пасля гэтага бязвізавы рэжым павінен зарабіць аўтаматычна. Улічваючы, што парламент сыходзіць у адпачынак у канцы ліпеня, ён яшчэ месяц будзе працаваць. Думаю, цягам месяца паспеюць правесці галасаванне», - адзначыў Шагал.
У пасольстве Ізраіля падкрэслілі, што яшчэ не атрымлівалі інструкцый у сувязі з прыняццем указа МУС краіны аб палягчэнні візавага рэжыму з Беларуссю. У сувязі з гэтым грамадзянам, якія жадаюць наведаць краіну, рэкамендуюць звяртацца ў амбасаду па візы ў дзейным парадку.
Нагадаем, міжурадавае пагадненне аб скасаванні віз паміж Беларуссю і Ізраілем было падпісанае 19 верасня 2014 года. Беларускі бок поўнасцю выканаў усе прадугледжаныя ўнутрыдзяржаўныя працэдуры.
28 красавіка на прэс-канферэнцыі ў Менску пасол Ізраіля паведамляў, што пагадненне з Беларуссю аб скасаванні віз можа зарабіць да пачатку верасня. З ягоных слоў, яно пачне дзейнічаць праз 90 дзён пасля адабрэння ўрадам і афіцыйнага апублікавання гэтай пастановы.