Die Welt: Цыпрас і Варуфакіс загубяць Грэцыю
1- 1.07.2015, 18:52
- 7,439
Грэкі не хочуць новай праграмы дапамогі з яе жорсткай эканоміяй і рэформамі. Але многія і не жадаюць выходзіць з еўразоны.
Калі пагутарыць у Афінах з грэцкімі грамадзянамі, то хутка высвятляецца, што многія не разумеюць значэння рэферэндуму. Але Цыпрас і Варуфакіс занадта баязлівыя, каб тлумачыць ім.
Аб гэтым піша Ян Дамс у сваім артыкуле «Цыпрас і Варуфакіс загубяць Грэцыю», апублікаваным на сайце нямецкай газеты Die Welt (пераклад - УНІАН).
Некаторыя грэкі ўважаюць Яніса Варуфакіса за героем. Міністр фінансаў неспакойнай краіны - той, хто выразна прамаўляе патрэбныя словы, не дазваляе сябе запалохаць сілай значных еўрапартнёраў. Той, хто не згінаецца, не поўзае.
Той, хто, нарэшце, вяртае грэкам тое, што было выкрадзена ў іх немцамі, чыноўнікамі ЕЦБ і рынкавымі лібераламі з Міжнароднага валютнага фонду (МВФ): не, не толькі грошы, але, перш за ўсё, гонар. У Афінах шмат хто ў гэта верыць.
Трэба прызнаць: крэдыторы ў некаторай ступені заслужылі такога чалавека. Цягам многіх гадоў яны з'едліва лаяліся пра грэкаў і адмаўляліся прызнаваць іх палітычную эліту. Яны паказвалі на Афіны пальцам. І яны пакінулі краіне значна менш фінансавага і палітычнага суверэнітэту, чым належыць дэмакратыі. Варуфакіс, і, вядома, ягоны прэм'ер Алексіс Цыпрас, - гэта вынік.
Варуфакіс неаднаразова памыляўся
І тут павінна спыніцца самабіццё еўрапейцаў, бо ўдваіх яны з’яўляюцца значна больш, чым праславутая вострая сякера на тоўсты сук. Яны - катастрофа для сваёй краіны. Сёння мы бачым гэта зноў, яны прымушаюць пра сябе казаць, бо яны раптам прадставілі новую праграму: просьбы пра больш лёгкія ўмовы і падаўжэнне тэрмінаў выплаты. Менавіта ў той дзень, калі старая праграма беспаспяхова закончылася. Еўрагрупа адразу адхіляе новыя прапановы. У сераду, як было сказана, будуць новыя перамовы. Затым ідуць таксама яшчэ раз новыя прапановы ад Афін.
Гэта дылема. Не асабліва вядомы эканаміст выпрабоўвае свае тэорыі ў краіне, якая эканамічна знаходзіцца на мяжы краху. Яе прэм'ер-міністр - эканамічна асабліва неспрактыкаваны - паддаецца спакусе і падтрымлівае гэта. І калі іх праекты ў рэчаіснасці раскідваюцца праз супраціў донараў, то вінаватыя не яны, а зноў іншыя.
Разважлівасць, прыстасаванне да рэальнасці - гэта не моцныя бакі Варуфакіса. Не так даўно грэцкі міністр фінансаў сцвярджаў, што банкі ў ягонай краіне не будуць закрытыя. З панядзелка рэальнасць даводзіць яму адваротнае.
І гэтак жа пераканаўча ў мінулым ён сцвярджаў, што Афіны проста не могуць быць банкрутам і выйсці з еўразоны. Бо ў такім выпадку еўрапейцы занадта шмат страцяць. Гледзячы на тое, як ідуць справы цяпер, можна сказаць, што ён зноў пралічыўся.
Не ўсе грэкі разумеюць, пра што гаворка
Ужо сёння Афіны вельмі імаверна не змогуць заплаціць МВФ. Неўзабаве яшчэ адная рата ЕЦБ пад пытаннем. Гэта проста пытанне часу, пакуль у Грэцыі не будуць раздадзеныя апошнія еўра. І калі грэкі ў нядзелю на рэферэндуме прымуць тую, пастанову, якую хочуць Цыпрас і Варуфакіс - а менавіта супраць апошняга абумоўленага ў Брусэлі пакета дапамогі - тады яны фактычна таксама прагаласуюць супраць еўразоны.
Варуфакіс ведае гэта. Цыпрас ведае гэта. Абодва проста занадта баязлівыя, каб растлумачыць свайму народу ўсе наступствы. Таму што, вядома, грэкі не жадаюць новай праграмы дапамогі з яе жорсткай эканоміяй і рэформамі. Але многія і не жадаюць выходзіць з еўразоны. І калі паслухаць іх на дэманстрацыі ў падтрымку «Сірызы» ў панядзелак увечары на плошчы Сінтагма ў Афінах, то некаторыя з іх не разумеюць, што менавіта гэта іх чакае ў канцы.
Аднак, некаторыя дагэтуль мяркуюць, што новае «не» прывядзе да перамоваў аб спісанні пазык, новай дапамогі на іншых умовах. Тое, што гаворка ідзе пра драхмы ці еўра, еўразону або еўрапейскую ўскраіну, многія не разумеюць. І Варуфакіс не спяшаецца гэта тлумачыць. Таму што выхад з еўразоны ў Грэцыі напраўду не такі ўжо і папулярны.
Бедныя грэкі
Гэта нядобрая сумесь баязлівасці і нахабства, калі грэцкі міністр фінансаў устае і кажа, што ён будзе звяртацца ў еўрапейскія суды праз тое, што яго краіну выкінулі з еўразоны. Якія ў яго падставы для звароту?
Тое, што ён больш не атрымлівае грошы ад еўрапейцаў, бо ён не можа знайсці з імі агульную мову? Тое, што ён больш не можа аплачваць рахункі? Што ён павінен быў закрыць банкі, бо іх нельга больш утрымліваць? Ці напраўду выхад ягонай краіны з еўразоны, пастанова якую прынялі іншыя, што гэта з'яўляецца вынікам ягонай палітыкі?
Калі ўрад Цыпраса пераможа ў рэферэндуме і Яніс Варуфакіс застанецца ва ўладзе, для Грэцыі стане амаль немагчымым застацца часткай еўразоны. Не таму, што іншыя ўрады валютнай зоны выставяць бедных грэкаў. А таму, што мужчыны, як Варуфакіс, не ў стане адаптаваць сваю палітыку да зменлівай рэальнасці. Бедныя грэкі.
