Украіна правядзе перамовы з крэдыторамі на наступным тыдні
- 1.07.2015, 21:56
- 2,782
Стораны дамовіліся праводзіць перамовы без папярэдніх умоў.
Украіна і спецыяльны камітэт крэдытораў дасягнулі згоды аб умовах прыватнасці і пачнуць перамовы на ўзроўні міністра фінансаў і крэдытораў на наступным тыдні, піша ЛІГАБізнесІнформ.
Як паведамляе прэс-служба Мінфіна, 30 чэрвеня 2015 года ў штаб-кватэры Міжнароднага валютнага фонду (МВФ) у Вашынгтоне адбылася сустрэча паміж дэлегацыяй Украіны на чале з адмысловым урадавым упаўнаважаным у пытаннях запазычанасці Віталіем Лісавенкам, чальцамі спецыяльнага камітэта крэдытораў Украіны і прадстаўнікамі МВФ.
"Сустрэча дала магчымасць для прадуктыўнага абмену думкамі паміж яе ўдзельнікамі аб макраэканамічных паказчыках Украіны і тэхнічных аспектах чаканай пазыковай аперацыі Украіны", - гаворыцца ў супольным прэс-рэлізе Мінфіна і спецыяльнага камітэта крэдытораў.
У выніку сустрэчы Украіна і чальцы спецыяльнага камітэта крэдытораў дасягнулі дамоўленасці аб умовах забеспячэння прыватнасці, што дазволіць прадстаўнікам Міністэрства фінансаў і крэдытораў правесці перамовы аб магчымым развязанні, якія пачнуцца на наступным тыдні. Стораны дамовіліся праводзіць перамовы без якіх-небудзь папярэдніх умоў і з мэтай дасягнення пагаднення аб умовах пазыковай аперацыі як мага хутчэй.
Нагадаем, раней міністарка фінансаў Наталля Ярэська дапусціла, што абвяшчэнне Украінай дэфолту ў ліпені "тэарэтычна магчымае". Да гэтага аналітыкі Goldman Sachs выказалі здагадку, што Украіна можа не выплаціць купон за еўрабонды 24 ліпеня і дапусціць дэфолт.