У Менску судзяць двух братоў, якія спрабавалі збегчы з залы суда
- 17.07.2015, 17:46
- 16,972
17 ліпеня ў Менскім гарадскім судзе пачаўся працэс паводле справы братоў Паповых.
Летась яны спрабавалі збегчы з-пад варты наўпрост у зале суда. Тады зламыснікаў судзілі за махлярства.
20 лістапада 2014 года пасля сканчэння паседжання ў судзе Савецкага раёна Менска абвінавачаныя папрасіліся ў туалет. Як і трэба, паводле інструкцыі, іх павялі па адным і пад наглядам. Затым суправадзілі ў канвойны пакой, і толькі за імі і трыма супрацоўнікамі зачыніліся дзверы, як Віталь выхапіў з рукава абрэзак трубы, які ўзяў у прыбіральні, і стаў збіваць канвойнага, пагражаючы забіць. Малодшы кінуўся на дапамогу брату, але яго хутка прыструнілі, пішуць «Беларускія навіны».
Нягледзячы на атрыманыя траўмы, у тым ліку чэрапна-мазгавую, міліцыянт прадоўжыў барацьбу і нават паваліў нападніка на падлогу. Трэці супрацоўнік папярэдзіў Папова, што будзе вымушаны ўжыць зброю, але той не адрэагаваў. Папераджальныя стрэлы некалькі астудзілі запал агрэсара і яго ўціхамірылі, затым абодвух адвялі ў камеры.
Цяпер яны перасоўваюцца з узмоцненым канвоем, выключна ў кайданках і ў суправаджэнні службовых сабак.
Вядома, што браты нарадзіліся ў Алматы, грамадзяне Казахстана. Часова жылі ў Маскве і Маскоўскай вобласці. У абодвух вышэйшая адукацыя, ёсць дзеці.
За спробу ўцёкаў, учыненую групай асоб з прымяненнем гвалту, паводле ч.1 арт.14 і ч.2 арт. 413 Крымінальнага кодэкса распачатая справа ў дачыненні да двух абвінавачаных. Судовае разбіральніцтва праходзіць у закрытым рэжыме, бо будуць разгледжаныя дакументы пад з грыфам «Для службовага карыстання».
Прысуд паводле артыкула «махлярства» ўвайшоў у дзеянне 12 траўня 2015 года, паведамляе «СБ Беларусь сёння».