Расейскі крэдыт у $760 мільёнаў адразу патрачаны на выплату запазычанасцяў

Беларусь адразу перанакіравала гэтыя грошы на выплату дэбютнага выпуску еўрабондаў, далажыўшы недахоп сродкаў з ЗВР.

Сродкі ад Масквы былі атрыманыя ўчора, нагадвае АФН.

«28 ліпеня 2015 на рахунак Міністэрства фінансаў паступілі сродкі дзяржаўнага фінансавага крэдыту ў адпаведнасці з Пагадненнем паміж Урадам Рэспублікі Беларусь і Урадам Расейскай Федэрацыі аб выдачы Ураду Рэспублікі Беларусь дзяржаўнага фінансавага крэдыту, укладзеным 24 ліпеня 2015 г», - паведаміла прэс-служба Мінфіна.

Беларусь і РФ 24 ліпеня падпісалі пагадненне аб выдачы Беларусі фінансавых рэсурсаў у расейскіх рублях на суму 760 млн даляраў ЗША на тэрмін 10 гадоў, уключаючы 4-гадовы ільготны перыяд.

«28 ліпеня 2015 года адначасова з апошняй выплатай купоннага даходу на суму 43,75 млн даляраў ЗША Міністэрства фінансаў накіравала сродкі плацежнаму агенту (Deutsche Bank AG, London) на выплату дэбютнага выпуску дзяржаўных аблігацый, размешчаных на міжнародным фінансавым рынку 3 жніўня 2010 года, на суму 1 млрд даляраў ЗША», - таксама паведаміў Мінфін РБ.

Улады РБ не прызнаюць, што выкарыстоўвалі расейскую фінансавую дапамогу на выплату дэбютных еўрабондаў, але наўрад ці можна назваць выпадковым атрыманне расейскіх грошай у апошні момант. Схема не з'яўляецца сакрэтам для ўрада РФ, які свядома цягнуў да апошняга з пералікам грошай, каб у беларускіх калег выпадкова рука не завагалася і прызначаныя для выканання міжнародных абавязанняў грошы выпадкова не сышлі б іншым атрымальнікам.

Сёння каціроўкі дэбютных еўрабондаў на Франкфурцкай біржы знізіліся на 12 базісных пунктаў да 99,12% ад наміналу. Стаўка купона па гэтым бондам складае 8,75% гадавых.

Пасля выплаты дэбютнага выпуску на рынку застанецца другі выпуск беларускіх еўрабондаў - сямігадовых з тэрмінам выплаты ў 2018 годзе. Каціроўкі гэтых бондаў за суткі страцілі 100 базісных пунктаў. Знізіўшыся з 99,5 да 98,5% ад наміналу.

Варта адзначыць, што для выплаты еўрабондаў Беларусі вымушаная далажыць амаль 300 млн даляраў з ЗВР, што безумоўна адаб'ецца на пагаршэнні гэтага паказчыка на справаздачную дату, але выбару ва ўладаў проста не было.