Рассельгаснагляд забракаваў 10 тон прадукцыі магілёўскай птушкафабрыкі

Груз быў вернуты адпраўніку.

Кіраваннем Рассельгаснагляду Бранскай і Смаленскай абласцей забаронены ўвоз больш за 10 тон замарожанага мяса птушкі, вырабленага філіялам «Сервалюкс Агра» СЗАТ «Сервалюкс». Пра гэта сайту charter97.org паведамілі ў прэс-службе ўстановы.

Груз быў затрыманы 28 ліпеня ў пункце «Чырвоная Горка» ў Смаленскай вобласці. Прадукцыя суправаджалася ветэрынарнымі сертыфікатамі, выдадзенымі дзяржаўнай ветэрынарнай службай Рэспублікі Беларусь 27 ліпеня. Падчас кантролю выяўлена, што ў названых дакументах адсутнічала дата выпрацоўкі прадукцыі. Пры фактычным даглядзе грузу адзначаны відавочныя сляды дэфрастацыі (размарожвання).

Было ўстаноўлена, што працэс размарожвання мяса адбыўся з прычыны невыканання тэмпературнага рэжыму транспарціроўкі. Акрамя таго, тып тары, заяўлены ў ветэрынарных суправаджальных дакументах, не адпавядаў фактычнаму.