Магілёўская журналістка абвінавачвае міліцыянта ў падтасоўцы дакументаў

Аліна Скрабунова падала скаргу на імя пракурора Магілёва на дзеянні міліцыянтаў, якія спрабавалі прыцягнуць яе да адміністрацыйнай адказнасці.

27 ліпеня суд Ленінскага раёна спыніў разгляд справы Скрабуновай, якая абвінавачваецца ў незаконным вырабе і распаўсюдзе прадукцыі СМІ, праз заканчэнне тэрмінаў накладання адміністрацыйнага спагнання, піша БелаПАН.

Раней супрацоўнікі Ленінскага РАУС абвінавацілі незалежную журналістыку ў датычнасці да вырабу відэасюжэтаў для замежнага СМІ - тэлеканала «Белсат» без акрэдытацыі ў МЗС як замежнай журналісткі. У падрыхтаваных Алінай Скрабуновай інтэрв'ю гаварылася аб сітуацыі, у якую трапілі работнікі збанкрутавалага прадпрыемства «Строммашына». Матэрыялы ўвайшлі ў рэпартаж, які выйшаў у эфір 26 траўня.

Паводле скаргі Скрабуновай, прынамсі, маёр міліцыі Сініцкі пры вядзенні ў дачыненні да яе адміністрацыйнага працэсу дапусціў мноства парушэнняў заканадаўства. «Я выявіла, што пратаколы апытання сведак, на парушэнні ў якіх я паказала ў сваім пратаколе апытання, і мой пратакол апытання замененыя», - сцвярджае журналістка, паказваючы на падробленыя, на яе думку, пратаколы апытання сведак.

«У пратаколе аб адміністрацыйным правапарушэнні за 21 ліпеня стаяць подпісы сведак Вайтовіч і Лахадынавай. Аднак пры яго складанні гэтых сведак не было», - заяўляе Аліна Скрабунова.

Таксама Скрабунова абвінавачвае намесніка начальніка ўправы аховы правапарадку і прафілактыкі УУС Магілёўскага аблвыканкама Дзмітрыя Паркава ў складанні «стылістычна непісьменнага рапарту», «у якім канкрэтна і наўпрост не пазначана, хто менавіта і якім чынам падрыхтаваў пералічаныя ў ім відэарэпартажы, у тым ліку і інкрымінаваны мне відэарэпартаж «Крызіс на беларускіх прадпрыемствах. Наракаюць рабочыя», - піша журналістка.

Яна просіць пракурора Магілёва правесці расследаванне названых ёю парушэнняў і прыцягнуць старэйшага інспектара аддзела аховы правапарадку і прафілактыкі Ленінскага РАУС Магілёва маёра міліцыі Сініцкага да адказнасці паводле закону, а падпалкоўніка міліцыі Паркава абавязаць здаць пісьмовы залік па расейскай мове на дакладнасць і зразумеласць выказвання сваіх думак.