Магілёўскі аблвыканкам: Верш «Клеветникам России» на помнік не вернем
16- 31.07.2015, 10:17
- 29,334
Улады Магілёва адмовіліся вяртаць на помнік Аляксандру Пушкіну пліту з вершам.
Намеснік старшыні аблвыканкама Валерый Мурашка даў годны адказ дзеячу рускага руху Беларусі Андрэю Герашчанку. Чыноўнік патлумачыў, чаму з бюста паэта ў Магілёве была дэмантаваная пліта з урыўкам з верша «Клеветникам России».
«Гэтыя, радкі з верша А.С.Пушкіна «Клеветникам России» ў XIX стагоддзі мелі просты сэнс і былі адказам паэта на пагрозы Расеі з боку Захаду.
У сучаснай сітуацыі, з улікам існавання суверэнных дзяржаў: Расейскай Федэрацыі і Рэспублікі Беларусь, пры наяўнасці на іх грамадска-палітычным полі рознапланавых грамадскіх арганізацый, якія прэзентуюць інтарэсы груп насельніцтва з рознымі ідэалагічнымі поглядамі, якія немагчыма не ўлічваць, гэтыя радкі маглі атрымаць розную ідэалагічную інтэрпрэтацыю, не адэкватную афіцыйнай пазіцыі.
У сувязі з чым, а таксама на падставе водгукаў, якія з'явіліся ў інтэрнэце на ўстаноўку помніка, кіраўніцтвам гарвыканкама было дадзенае ўказанне змены выгляду пастамента, на жаль, гэта было выкананае ў дзень дзяржаўнага свята Расейскай Федэрацыі і не мела антырасейскай скіраванасці», паведаміў ён .
Бюст Аляксандру Пушкіну быў усталяваны ля бібліятэчнага каледжа ў Магілёве ў пачатку чэрвеня. Гэта быў падарунак ад грамадскай арганізацыі «Алея расейскай славы». Пасля ўсталявання людзі прыгледзеліся, што на пастаменце размешчаны радкі, якія сёння гучаць як мінімум правакацыйна:
…Иль нам с Европой спорить ново?
Иль русский от побед отвык?..
…Стальной щетиною сверкая,
Не встанет русская земля?..
Так высылайте ж к нам, витии,
Своих озлобленных сынов:
Есть место им в полях России,
Среди нечуждых им гробов…
Адразу пасля гэтага ў інтэрнэце пачала з'яўляцца негатыўная рэакцыя. Ужо праз тыдзень пасля ўсталявання гарадскія ўлады прынялі пастанову прыбраць шыльду з вершам з помніка.
Адзначым, што верш «Клеветникам России» стаў адказам Пушкіна на рэакцыю краін Захаду на жорсткае падаўленне нацыянальна-вызвольнага паўстання 1830 года на тэрыторыі Беларусі, Літвы і Польшчы. У ім ёсць і радкі, прысвечаныя гэтай падзеі:
О чем шумите вы, народные витии?
Зачем анафемой грозите вы России?
Что возмутило вас? волнения Литвы?
Оставьте: это спор славян между собою,
Домашний, старый спор, уж взвешенный судьбою,
Вопрос, которого не разрешите вы.