Алег Вераціла: Мы не далі «Цюрыху» шанцаў забіць

Абаронца менскага «Дынама» пракаментаваў выязную перамогу над «Цюрыхам» (1:0) у першым матчы 3-га кваліфікацыйнага раўнду Лігі Еўропы.

Алег Вераціла падвёў вынікі сустрэчы ў інтэрв'ю сайту клуба.

- Гульня далася цяжка, гэта было відаць. Уся каманда сыходзіла з поля стомленай.

- Так, гэтая гульня нам далася вельмі цяжка. Спаборнік атакаваў, нам даводзілася шмат абараняцца і мы стараліся гуляць кампактна. Нашы дзеянні былі правільныя. Мяркую, што мы не далі спаборніку шанцаў забіць. Маглі яшчэ ў першым тайме самі вызначыцца, але не выйшла. Наша кампактнасць дала вынік. 1:0 на выездзе - гэта выдатны вынік. У Берасці ўжо будзем па-іншаму гуляць.

- Галоўны трэнер гаспадароў адзначыў сёння на прэс-канферэнцыі вельмі пісьменныя дзеянні нашай лініі абароны. Прыемна?

- Ну вядома, але мяркую, што гэта ўсё заслужана. Мы згулялі вельмі годна. У «Цюрыха» добрая каманда, выдатныя выканаўцы. Выйшаў на замену Шыхаўі (капітан) - гэты хлопец запомніўся.

- Наколькі нервовым выйшаў фінал?

- Што ў першым, што ў другім тайме - фінал атрымліваўся цяжкі. Але за кошт правільных дзеянняў змаглі правесці гэтыя інтэрвалы адносна спакойна. Не было ў «Цюрыха» сёння небяспечных нападаў. Па вялікім рахунку, усё было даволі вяла.

Здзіўлены, што на трыбунах такога добрага стадыёна сёння сабралася заўзятараў менш, чым тыдзень таму на «Трактары»?

Калі шчыра, так. Фанатаў у «Цюрыха» сёння шмат было, больш чым простых гледачоў. Гэта здзівіла вельмі, бо гэта нязвыкла для нас. У нас жа фанатаў збіраецца менш, чым людзей на цэнтральных трыбунах. Я думаў, што ў Цюрыху людзей будзе значна больш: добры стадыён, добры горад, але нават траціна стадыёна не была запоўненая. Можа праз такую падтрымку каманда не моцна гналася наперад сёння.

- У Балгарыі заўзятараў было амаль не чуваць. Як было сёння?

- Сёння ўсё было па-іншаму. Было чуваць. Чуў, што заўзятары сёння залазілі на агароджу і каму-небудзь з УЕФА гэта не вельмі спадабалася, але што зрабіць?.. Малайцы. Вельмі прыемна, што нас падтрымлівалі.

- Які настрой будзе перад гульнёй у адказ? Ты ж памятаеш атмасферу матчу супраць туркаў? 2 гады таму?

- Настрой добры, як жа па-іншаму? Атмасферу вядома памятаю, было вельмі крута. Спадзяюся, і ў чацвер людзі прыйдуць. Чакаем заўзятараў. Берасцейскія заўзятары ўмеюць падтрымліваць, ды і фанаты нашы сябруюць. Спадзяюся, і яны за нас пазаўзеюць. Думаю, стадыён будзе запоўнены і будзе нас гнаць наперад!