Даля Грыбаўскайтэ: Расея прадаўжае паводзіць сябе, як агрэсар

Крэмль не хвалююць ні жыцці грамадзян Расеі, ні іхныя лёсы.

Прэзідэнт Літвы Даля Грыбаўскайтэ мяркуе, што эканамічнае эмбарга, уведзенае Масквой летась, найбольш паўплывала на саму Расею - у краіне паменшыўся асартымент прадуктаў харчавання і выраслі кошты, піша "Росбалт".

"Расея сама наважыла не прапускаць на сваю тэрыторыю прадукты з Захаду і сама наважыла абдзяліць сваіх людзей. Гэта выклікала і рост коштаў, а таксама скарачэнне колькасці і асартыменту прадуктаў. Такі крок, калі Расея сама да сябе ўжыла санкцыі, якія не былі прапановай Захаду, сведчыць, што рэакцыя Расеі неадэкватная, і з'яўляецца наступствам яе ўласнай агрэсіўнай палітыкі", - сказала Даля Грыбаўскайтэ ў інтэрв'ю радыёстанцыі LRT.

На думку кіраўніцы літоўскай дзяржавы, заявы Масквы аб тым, што гэтыя санкцыі з'яўляюцца захадам у адказ для краін Еўразвязу - прапаганда. "Напраўду ад такіх санкцый пацярпела і пакутуе сама Расея і яе людзі, а не краіны Захаду", - сцвярджае прэзідэнт Літвы.

Яна адзначыла, што ўплыў расейскага эмбарга на Літву не вельмі вялікі. У той жа час Грыбаўскайтэ сцвярджае, што санкцыі Захаду ў дачыненні да Расеі сябе апраўдалі. "Расея была выкінутая з сустрэч Вялікай васьмёркі, найбліжэйшыя выканаўцы палітыкі Крамля - расейскія службовыя асобы, вайскоўцы, сепаратысты на Усходняй Украіне - не могуць ездзіць у Еўрапейскі звяз, іх рахункі ў банках замарожаныя", - нагадала прэзідэнт.

Яна дадала, што Расея прадаўжае "паводзіць сябе як агрэсар, якога не хвалююць ні жыцці людзей, ні іхныя лёсы".

Нагадаем, Расея забараніла ўвоз прадуктаў харчавання і сельскагаспадарчых прадуктаў з краін ЕЗ і ЗША ў жніўні мінулага года.